Kene men qaraqurt kúshine mindi

Jaz mezgiliniń aptappen bastalǵany Ońtústik jurtyna «jaý jaǵadan alǵanda, bóri etek­­teniń» kerin keltirip tur. Mo­rokko shegirtkesi birtalaı aýdan­nyń sharýalaryn shyryldatyp jatqanda, kene shaq­qan jas jigit qaıtys boldy. Kene shaqqan ordabasylyq jas jigit Arys qalasyndaǵy jeke­menshik medısınalyq klınıkaǵa qaralǵan eken. Qazir osyǵan baılanysty qyzmettik tekserý júrip jatyr. Oqıǵa ornyna arnaıy bar­ǵan oblystyq densaýlyq saq­taý basqarmasynyń basshysy Seıitjamal Pákeev qaıtys bolǵan azamatpen baılanys­ty bolǵan adamdardyń bar­lyǵy medısınalyq baqylaýǵa alynǵanyn aıtty. – Naýqas qaralǵan jekemen­shik medısınalyq mekemege tekserý júrgizemiz. Marqumnyń me­dısınalyq kómekke kesh jú­gin­genin de aıta keteıik. Bıyl kene shaqqandar kóp tir­keldi. Barlyǵyna ýaqtyly kómek kórsetýge umtylyp jatyr­myz, – dedi Seıitjamal Pákeev. Bul – jyl basynan beri qyrym qandy bezgegi boıynsha ólimge soqtyrǵan alǵashqy jaǵdaı. Sonymen qatar, qara­qurt shaqqan 25 adam jansaqtaý bólimine tústi. Kún ysyǵaly ýly jándikter kúsheıip ketti. Olar kóbine qurǵaq jerlerdi mekendep uıa salatyndyqtan, shalǵyndy alqaptar men shóbi kúnge kúıgen úı irgelik jerlerdiń ózi qaýipti bolyp tur. Tıisti oryndar qala ishinde qaýlap ósken shópterdi oryp dárilegenimen, qaraqurt shaqqan adamdardyń legi tolas­tar emes. Oblystyq joǵary qysym­men emdeý ortalyǵy bas dárigeriniń orynbasary Ikram Tóleev aýrýhanaǵa túsip jatqan adamdardyń ýlaný qaýpi joǵary bolǵandyqtan, toksıkologııalyq emes jansaqtaý bólimine túsip jatqanyn málimdedi. Baqtııar TAIJAN, «Egemen Qazaqstan» Ońtústik Qazaqstan oblysy