Aqparat quraldary el múddesin kózdesin

Elbasy Nursultan Nazarbaev Aqparat jáne kommýnıkasııa mınıstri Dáýren Abaevty qabyldady, dep habarlady Prezıdenttiń baspasóz qyzmeti. D.Abaev taıaýda qurylǵan mı­nıs­trlik qyzmetiniń  búginge deıin­gi nátıjeleri men aldaǵy kezeńge ar­nalǵan josparlary týraly baıan­dady. Memleket basshysy otandyq bu­­qaralyq aqparat quraldary qyz­metiniń sapasyn arttyrý qajet­tigine nazar aýdardy. – Mınıstrlik dál osy maq­sat­pen quryldy. Barlyq álemdik, sonyń ishinde reseılik BAQ-tar óz eliniń azamattarynyń patrıottyq sezimin arttyrýǵa, der kezinde aqparat usyný jáne barlyq máse­lege ýaqtyly ún qatý arqyly syrt­tan keletin aqparattyq shabýyl­darǵa qalqan bola otyryp, ish­ki saıası tynyshtyqty saq­taýǵa kómektesedi. Qajet bolǵan jaǵdaıda halyqaralyq tájirıbeni engizip, osyndaı jumystar atqa­rý kerek. Buqaralyq aqparat qu­ral­­dary – orasan kúsh, bul, ási­rese, kóptegen qateri bar ınternet keńis­tikke qatysty, – dedi Nursultan Nazarbaev. Qazaqstan Prezıdenti qazirgi kezde memleket eldiń ornyqty damýyn qamtamasyz etý úshin júıeli sharalar qabyldap jatqanyn, ony halyqqa tıisti túrde jetkizý qajettigin aıtty. – Barlyq BAQ menshik for­masyna qaramastan, óz halqy­nyń múddesi úshin jumys isteýge tıis. Bul rette memlekettik tapsyrys aıasynda beriletin qarajattyń qa­tań esebin júrgizý qajet. Bul má­seleni zań deńgeıinde retteý qa­jet bolsa, solaı isteý kerek, – dedi Memleket basshysy. D.Abaev uıymdastyrýshylyq jumystary turǵysynan mınıs­tr­liktiń qalyptasý kezeńi aıaqtal­ǵanyn, júktelgen mindetterdi oryndaýǵa daıyn ekenin málimdedi. Bul mindetter básekege qabiletti aqparattyq keńistikti damytýǵa jáne túrli saladaǵy memlekettik saıasatty aqparattyq qoldaýdyń tıimdiligin jaqsartýǵa, telekommýnıkasııa salasyndaǵy qyzmet sapasy standarttaryn jetekshi elder deń­geıine jetkizýge, elektrondyq úkimetti ashyq ári esep berýshi memleket qalyptastyrý aıasynda odan ári ilgeriletýge baǵyttalatyn bolady. Nursultan Nazarbaev kezdesý qorytyndysy boıynsha mem­le­kettik aqparattyq saıasatty odan ári ilgeriletý, memlekettik qyzmet kórsetýdiń tıimdi tetikterin engizý jáne telekommýnıkasııalyq ınfraqurylymdy jetildirý jóninde birqatar naqty tapsyrma berdi.