Almaty men Tegeran arasy

áýe jolymen jalǵasatyn boldy Elimizdegi eń iri áýe tasymaldaýshy kompanııa tuńǵysh ret Almatydan Iran astanasy – Tegeranǵa tikeleı qatynaıtyn áýe reısin ashty. Bul eki el Prezıdentteriniń memleketaralyq ekono­mıkalyq qatynastardy damytý jónindegi kelisiminiń arqasynda júzege asyp otyr. Ushaqtar aptasyna úsh ret qatynaıdy. Almatydan shyqqan ushaq Tegeranǵa 2,5 saǵatta je­tedi. Aldaǵy ýaqytta eki memleket arasyndaǵy barys-kelis qatynasy vızasyz bolýy múmkin. Jalpy, reıstiń ashylýy týrızmdi damytýǵa serpilis beredi. Syrtqy ister mınıs­trliginiń má­limeti boıynsha, byltyr Qa­zaqstan men Iran arasyndaǵy saý­da aınalymy 1 mıllıard AQSh dollaryn quraǵan. Endi jańa áýe reısiniń ashylýymen eki el arasyndaǵy jolaýshylar tasymaly jylyna 7 myń adamǵa jetedi degen boljam bar. Qazir elimizden Iranǵa baratyn jolaýshylardyń 60 paıyzy – týrıster, qalǵany – kásipkerler. – Búginde Iranǵa vıza alý qıyn emes, kúnine 15-20 danasyn rásimdeımiz. Biz ony baryn­sha jeńildetýge kúsh salýdamyz. Bolashaqta Iranǵa vızasyz qa­tynaý máselesi qarastyrylyp jatyr. Ol úshin Qazaqstanmen ekijaqty kelisim bolýy kerek. Mundaı qadam baýyrlas eki eldiń arasyndaǵy qarym-qatynasty odan ári nyǵaıtýǵa yqpal etedi dep oılaımyn, – de­di Irannyń Almatydaǵy bas kon­sýldyǵynyń ekinshi konsýly Mahmýd Asadı. Qanat ESKENDIR, «Egemen Qazaqstan» ALMATY