Qytaı kommýnıstik partııasynyń negizin qalaǵanyna 95 jyl tolýyna arnalǵan saltanatty jıynda 2 shilde kúni sóılegen sózinde partııa ortalyq komıtetiniń bas hatshysy Sı Szınpın Qytaıdyń Reseımen birge NATO-ny taptap kete alatyn áskerı alıans qurǵaly jatqany týraly sensasııalyq málimdeme jasady.
Qytaı basshysy,
politonline.ru aqparyna qaraǵanda, «partııaǵa, halyqqa jáne álemge» aldaǵy ýaqytta «Reseı men Qytaıdyń odaǵy álem qurylymynyń bolashaǵyn anyqtap beretinin» jetkizgen.
«Álem qazir radıkaldy ózgeristerdiń sheginde tur. Biz Eýroodaqtyń birtindep qurdymǵa qulap, AQSh ekonomıkasynyń qalaı kúırep bara jatqanyn, munyń bári álemniń jańa qurylymyn jasaýmen aıaqtalatynyn kórip otyrmyz. Endi dál mundaı jaǵdaı eshqashan týmaıdy, al 10 jyldan keıin bizdi jetekshi tutqasy QHR men Reseı odaǵy bolatyn jańa álemdik qurylym kútip tur», – dedi senimmen Qytaı lıderi.
Alaıda, aıtylǵan sózge qaraǵanda, bul jerdegi áńgime tek ekonomıkalyq odaq týrasynda ǵana bolyp otyrǵan joq. Álem sarapshylarynyń, dıplomattary men saıasatkerleriniń málimetteri boıynsha, Qytaı men Reseıdiń arasy «eshqashan dál qazirgideı keremet bolǵan emes». Buqaralyq aqparat quraldarynyń málimetinshe, Sı Szınpın bul jerde NATO-ny qaýqarsyz etip tastaıtyn asa qýatty áskerı alıans týrasynda sóz qozǵap otyr. Bul tekten-tek te emes, qazir Reseı men Qytaıdyń armııalary álemdegi tıisinshe ekinshi jáne úshinshi qýatty qarýly kúshter sanalady. Buǵan qosa, bul elderdiń ekeýi de ıadrolyq memleketter bolyp tabylady.
«Biz qazir AQSh tarapynan Reseıge qatysty da, Qytaıǵa qatysty da agressııalyq áreketterdi baqylap otyrmyz. Men qazir Reseı men Qytaı NATO-nyń ózi aldynda qaýqarsyz bolyp qalatyn asa qýatty alıans qura alady, bul Batystyń ımperııalıstik umtylystaryna toqtaý salady dep oılaımyn», – dedi Sı óziniń sózinde.
Buǵan qosa, Qytaı lıderi óz eli armııasyn keń aýqymdy modernızasııa jasaýǵa shaqyrdy.
«Bizdiń elimizdiń halyqaralyq mártebesine saı armııa qurý – strategııalyq mindet. Biz ekonomıkalyq damýdy eldiń qorǵanys qabiletin arttyrýmen, armııany jańǵyrtýmen baılanystyrýymyz kerek», – dedi ol.
Eske sala keteıik, 2014 jyldyń ishinde-aq «Sınhýa» agenttigi Ýkraınadaǵy memlekettik tóńkeris úshin Batys pen AQSh-ty aıyptaǵan málimdeme jarııalaǵan bolatyn. Osydan kein Beıjiń BUU-da Reseıge qarsy qararǵa daýys berýden bas tartty,sondaı-aq alda AQSh-pen arada sózsiz soǵys bolatynyn habarlady.
Buǵan qosa, Qytaı BAQ-tary «orystar qıyn bolǵan saıyn kúsheıe túsedi» degendi san márte qaıtalap jazdy. Sonymen qatar Qytaı Reseıge ekonomıkalyq saladan bastap áskerı kúsh-qýatqa deıingi kómektiń barlyq túrin kórsetetýge daıyn ekenin aıta bastady. Muny QHR syrtqy ister mınıstri Van I Gonkongtiń «Fenhýan» telearnasynyń efırinde sóılegen sózinde atap ótti.
Talǵat RAIYMBEK.
