Keshe Aqordada Elbasy Nursultan Nazarbaev Rıo Olımpıadasyna baratyn sportshylarmen kezdesý barysynda olarǵa úlken senim júkteletinine basa nazar aýdardy.
– Senderdiń Olımpıadaǵa qatysýlaryń búkil otandastarymyzǵa rýh beredi jáne qýanysh syılaıdy. Sol sebepti, aldaǵy jeńisterińdi el Táýelsizdiginiń 25 jyldyǵyna arnalǵan úlken syı retinde kútemiz. Senderdiń jeńisterińe erekshe senim artyp, Olımpıadadan soń jeńimpazdardy maqtanyshpen jáne qurmetpen kútetin bolamyz, – dedi Memleket basshysy.
Elbasy búgingi jetistikter keshegi aǵa urpaqtyń zańdy jalǵasy ekendigin de erekshe qurmetpen eske ala otyryp, onyń táýelsizdik alǵannan keıin de zańdy túrde jalǵasqandyǵyna toqtaldy.
– Keshegi keńestik zamannan beri qaraı alatyn bolsaq, Áljan Jarmuhamedov, Nellı Kım, Jaqsylyq Úshkempirov sııaqty úlken aǵa-apalaryńyz Qazaqstannyń mereıin kóterip, jeńip shyqqan edi. Táýelsizdik jyldarynda da sportshylarymyz Olımpıadada jeńip alǵan 59 medaldiń 17-si altyn alqa bolatyn. Rıo-de-Janeıroda da ıgi úrdis jalǵasyp, elimizdiń mereıi aspandaı túsetindigine senimdimin. Naǵyz patrıot qana eldiń abyroıy úshin taıtalasta óz múmkinshiliginiń sheginen de shyǵyp jeńiske jetetin bolady, – dedi Nursultan Ábishuly.
Elbasy Olımpıada syndy iri dodalarda jeńiske jetý úshin memleket tarapynan búkil jaǵdaıdyń jasalyp jatqandyǵyn jetkizdi.
– Sońǵy úsh jyldyń ishinde olımpıadalyq rezervti keshendi túrde daıyndaý úshin elimizde birneshe halyqaralyq deńgeıdegi sport nysandary salyndy. AIBA Búkilálemdik boks akademııasy, Almatydaǵy Dzıýdo akademııasy, Tarazdaǵy «Taraz-Arena» stadıony osylardyń qatarynda. Sondaı-aq, «Qaraǵandy-Arena» muz saraıy men elordadaǵy júzý kesheni bar kópfýnksıonaldy muz saraıy iske qosyldy. О́skemen qalasyndaǵy Olga Rypakova atyndaǵy Jeńil atletıka ortalyǵy men Almatydaǵy Aleksandr Vınokýrov atyndaǵy sport saraıy olımpıadashylardy daıarlap jatyr, – dedi el Prezıdenti.
Memleket basshysy qazaqstandyq olımpıadashylardyń baǵyndyrǵan bıigi asqaq ekendigin aıta kelip, Rıoda sannan góri sapaǵa kóbirek mán berý qajettiligine nazar aýdardy.
– Rıo Olımpıadasyna barlyǵy 206 elden 10 myńnan astam sportshy qatysady. Barlyǵy da kileń dúldúl, barlyǵynyń da jeńiske qol jetkizgisi keledi. Bizdiń elimiz 38 sport túriniń 26-synan 100-den astam joldama aldy. Bul kórsetkish jaman emes, biraq joldamanyń sany emes, sportshylardyń sapasy qajet ekenin jaqsy bilesizder, – dedi Nursultan Ábishuly. Nursultan Nazarbaev elimizde sportty nasıhattaýda otandyq «Qazsport» telearnasynyń róli joǵary ekendigin de aıryqsha atap ótti.
– Osydan týra úsh jyl buryn, 2013 jyldyń shildesinde sportty nasıhattaıtyn «Qazsport» arnasy qurylyp, ol otandyq sportshylar qatysatyn jarystardy turaqty túrde kórsetip keledi. Bul senderdiń ónegeleriń arqyly jas sportshylardy tárbıeleýge de óz úlesin qosady. Telearnanyń joǵary reıtıngisi – onyń sportty nasıhattaýda tanymal bola bastaǵandyǵynyń aıǵaǵy. Sportpen shuǵyldaný arqyly jeńiske umtylys, alǵa qoıǵan maqsatqa jetýge talpynys sııaqty mańyzdy qasıetter qalyptasady. Sport degenimiz – myqty densaýlyq, rýhtyń kúshtiligi, patrıotızm. Men jastardy sportpen shuǵyldanýǵa shaqyramyn, – dedi Elbasy.
Qazaqstan Respýblıkasynyń Prezıdenti elimizde paralımpıada qozǵalysynyń damýyna memlekettiń júıeli túrde qoldaý kórsetip kele jatqandyǵyn, olardyń arasyndaǵy sportpen aınalysqysy keletin azamattarǵa barlyq jaǵdaı jasalyp otyrǵandyǵyn da atap kórsetti.
Sondaı-aq, Memleket basshysy Rıo Olımpıadasy bul Qazaqstannyń qatysqaly otyrǵan 12-shi Olımpıadasy ekendigin, elimiz kók Týdyń astynda 5 ret jazǵy, 6 ret qysqy Olımpıada oıyndaryna qatysqanyn eske saldy. Qazaqstandyq sport sańlaqtary 17 altyn medalǵa ıe bolǵandyǵyn, Rıo-de-Janeıroda osy dástúrdiń jalǵasyp, mereıimizdiń aspandaı túsetindigine senim bildirdi.
О́z kezeginde olımpıadashylar atynan sóz alǵan bapkerler men sportshylar sporttyń damýyna memleket tarapynan jasalyp jatqan qamqorlyqqa oraı Nursultan Ábishulyna alǵystaryn aıtyp, Rıo Olımpıadasynda bıik belesten kórinetindikterin jetkizdi.
Myrzaǵalı Aıtjanov,
bokstan Qazaqstan quramasynyń bas bapkeri:
– Baıraqty básekede elimizdiń namysyn qorǵaý – bárimizge zor mártebe ári úlken jaýapkershilik. Rıodaǵy jazǵy Olımpııa oıyndary el Táýelsizdiginiń 25 jyldyǵyna tuspa-tus kelip otyr. Bul táýelsiz elimizdiń qatysyp otyrǵan 12-shi Olımpıadasy. Buǵan deıin 59 medal alyp, sonyń 17-si altyn bolǵan edi. Osy jeńisti joldyń bıyl da jalǵasaryna senemiz.
Olga Rypakova,
London Olımpıadasynyń chempıony:
– Elimizde sporttyq nysandardyń sany jyldan-jylǵa kóbeıip keledi. Búgingi kúni 4,5 mıllıonǵa jýyq qazaqstandyq sportpen aınalysady. Elimizde ótip jatqan túrli sport saıystarynan tikeleı habar júrgizetin «Qazsport» telearnasyna úlken rahmet. Sport patrıottyq rýhymyzdy shyńdap, jeńiske degen jigerimizdi janı túsedi. Bizdiń Olımpıadalyq quramanyń sapynda 10-nan astam ulttyń ókili bar. Osyndaı dostyǵy berik, birtutas komanda arqyly elimizdiń abyroıyn asqaqtatatyn bolamyz. Rıo-de-Janeıroda biz búkil álemge asqaq rýhymyzdy tanytamyz.
Danııar Eleýsinov,
bokstan álem chempıony:
– Bizdiń boksshylar Olımpıadadan eshqashan júldesiz oralǵan emes. Elimiz jazǵy Olımpııa oıyndarynda jeńip alǵan 52 medaldiń 17-si bylǵary qolǵap sheberleriniń úlesinde. Jáne onyń 6-ýy altyn. El qorjynyna eń kóp altyn salǵan da, eń kóp medal alǵan da boksshylar. Biz Máńgilik Elimizdiń Kók týyn árqashan bıik ustaımyz. Ol – álemdegi eń bıikte jelbireýge laıyq Tý.
Gúzel Manıýrova,
Qazaqstannyń qyzdar kúresi quramasynyń múshesi:
– Qazaqstan sporttyq derjava. Bizdiń Týymyz ben Ánuranymyzdy búkil álem biledi. Olımpııa oıyndarynda bizdiń Ánuranymyz 17 márte shyrqaldy. Rıo-de-Janeıroda óz elimizdiń aldyńǵy qatarly, kúshti memleket ekenin taǵy da pash etetin bolamyz.
Raýshan Qoıshybaeva,
Qazaqstannyń paralımpıadalyq quramasynyń múshesi:
– Elimizde múmkindigi shekteýli adamdarǵa búkil jaǵdaı jasalǵan. Múgedekterge arnalǵan 12 sport klýby jumys isteıdi. 25 myńnan astam múmkindigi shekteýli adam sportpen júıeli túrde aınalysady. Osynyń nátıjesinde paralımpıada dástúrli túrde damyp keledi. Paralımpıadalyq sportshylarymyz sońǵy úsh jylda halyqaralyq saıystarda 250 medal aldy. Osy joldy jalǵastyryp Brazılııada el abyroıyn laıyqty qorǵaımyz dep ýáde beremiz.
Kezdesý sońynda Qazaqstan Prezıdenti Olımpıadalyq quramanyń tý ustaýshysy Rýslan Japarovqa Memlekettik týdy tapsyrdy. Osylaısha, taekvondodan halyqaralyq týrnırlerdiń jeńimpazy, 20 jastaǵy Rýslan Rıoda kók Týdy jelbiretip alyp shyǵatyn bolady. Qazaqtan shyqqan tuńǵysh Olımpıada chempıony Áljan Jarmuhamedovtiń jeńisti jolyn Rýslan Japarov bastaǵan olımpıadalyq úmitter shoǵyry jalǵastyrady.
Ǵabıt ISKENDERULY,
«Egemen Qazaqstan»
