Oraza aıt merekesi qutty bolsyn!

Qurmetti otandastar, baýyrlar! Oraza aıt merekesine aman-esen jetkizgen Alla taǵalaǵa sansyz shúkirler men madaqtar bolsyn. Sizderdi musylman qaýymynyń ulyq, qasterli merekesi – Oraza aıt meıramynyń bastalýymen quttyqtaımyn. Aıt múbárak bolsyn, aǵaıyn! Qasıetti Ramazan aıynyń aıaqtalǵanyn bildiretin Oraza aıt – meıirimdiliktiń, ıgiliktiń, birliktiń, izettiliktiń, qaıyrymdylyqtyń merekesi. Bul meıram barsha halyqty izgilikke uıytady. Elimizdiń musylman qaýymy qasıetti Ramazanda aýyz bekitip, sharapaty mol aıda jasalǵan izgi is-sharalarymyzǵa atsalysty. Meshitterimizde aýyzasharlar men qaıyrymdylyq aksııalar ótti. Turmys jaǵdaıy tómen otbasylaryna kómek kórsetildi. Saýaby teńdessiz osynaý jaqsy isterge úles qosqan otandastaryma ózimniń jáne Qazaqstan musylmandary dinı basqarmasynyń atynan «Alla razy bolsyn» deımin. «Aıt» sózi – «merekeleý», «hal surasý», «bir-birin qýantý», «qýanyshqa toptalý» degen maǵynalardy bildiredi. Jaratýshy Iemiz árbir izgi amal men ıgilikti istiń saýabyn berip, meıirim-shapaǵatyn tógedi. Hadıs-sharıfte aıtylǵandaı, Alla taǵala: «Pendelerim Men paryz etken orazany atqaryp, aqysyn alýǵa (aıt namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...»,  – deıdi. Oraza aıt – bir aı boıy oraza ustap, yqylaspen jaqsylyq jasaǵan adamnyń qurmetke, marapatqa ıe bolatyn kezi. Alla barshamyzdy mol saýapqa kenelgen quldarynyń qataryna qosýyn tileımin. Aıt kúninde tolyq jýynyp, jupar ıis sebinip, jamaǵatpen aıt namazyna qatysýdyń saýaby erekshe. Aıt namazyna barýdan buryn qurmadan dám tatý – paıǵambarymyz Muhammedtiń (Oǵan Allanyń salaýaty men sálemi bolsyn) súnnet amaly. Aǵaıyn-týysty, kórshiler men ózge ult ókilderin ortaq merekemen quttyqtap, tileýlestik bildirý – ıgi amal. Oraza aıt – otbasylyq mereke. Meıram kúni ata-anamyzǵa, balalarǵa syılyq úlestirip, aǵaıyn-kórshi, týys, baýyrlardy qonaqqa shaqyryp, aıryqsha kóńil bólý de – saýapty is.   Qadirli qaýym! Oraza aıt merekesi qutty bolsyn! Alla taǵala ustaǵan orazamyzdy, duǵa-tilekterimizdi, qasıetti aıda jasaǵan árbir qaıyrly amaldarymyzdy, bergen zeket pen pitir sadaqalarymyzdy qabyl etip, mol saýaptan jazǵaı! Árbir otbasyna amandyq, jaqsylyq, denderińizge saýlyq, jumystaryńyzǵa bereke tileımin! Rabbymyz barshamyzdy ramazannan ramazanǵa deıin aman-esen jetkize bersin! Elimiz aman, jurtymyz tynysh, Táýel­sizdigimiz baıandy bolǵaı! Áýmın!  Erjan qajy MALǴAJYULY, Qazaqstan musylmandary dinı basqarmasynyń tóraǵasy, Bas múftı