Astanada Qazaqstan Respýblıkasynyń Prezıdenti Nursultan Nazarbaevtyń júldesi úshin «Qazaqstan barysy» respýblıkalyq týrnıri óz máresine jetti.
Oǵan qalalyq, aýdandyq jáne oblystyq týrnırlerde irikteýden ótken balýandar qatysty. Bıylǵy dodada jergilikti jerde iriktelgen 32 balýanmen birge alǵash ret áskerıler arasynda ótken týrnırdiń jeńimpazy kúsh synasty. Sonymen birge, 2015 jylǵy «Qazaqstan barysy» Beıbit Ystybaev taǵy bir ret baǵyn synap kórdi. Ol týrnırge eshqandaı irikteýsiz keldi.
Bıylǵy synda «Qazaqstan barysy» týrnıriniń fınalyna alǵash ret joldama alǵan 11 balýan boldy. Týrnırdiń ashylý saltanaty ótkennen keıin balýandardyń qarsylastaryn anyqtaý úshin jerebe tartyldy. Osylaısha sportshylar beldesýdi fınaldyń 1/16 bóliginen bastady.
Alǵashqy aınalymda jerebe boıynsha «Qazaqstan barysy» týrnıriniń 2011 jylǵy tuńǵysh jeńimpazy Ulan Rysqul men 2013 jylǵy jeńimpazy shyǵysqazaqstandyq Aıbek Nuǵumarov kezdesti. Asa tartysty beldesýde Ulan Rysqul jeńiske jetip, kelesi aınalymǵa joldama aldy. Osy aınalymda týrnırdiń 2014 jylǵy kúmis júldegeri, Qaraǵandy oblysynyń ókili Asyl Barmenov pen Syr boıynyń balýany, «Qazaqstan barysynyń» 2014 jylǵy qola belbeý ıegeri Rýslan Ábdirazaqovpen kúresti. Bul kezdesýde Rýslan jeńiske jetti. Fınaldyń 1/8 bóliginde ol astanalyq balýan Aıtýar Abdýlovpen kezdesti. Beldesýde Abdýlov qarsylasynan aılasyn asyryp ketti. Bul synda Rýslannyń aǵasy Ulan Rysqul da jeńilis tapty. Ol bıyl birinshi ret Qyzylorda oblysynyń atynan emes, ózi týyp-ósken Almaty oblysynyń atynan óner kórsetti.
Osy týrnırde Almaty qalasynyń ókili Aleksandr Kasachev mańǵystaýlyq Erbol Igilikti bes sekýndta utyp, rekord jańartty. Almatylyq balýan bıylǵy jyly «Almaty barysy» atanyp, «Qazaqstan barysyna» joldama alǵan edi. Keıinnen meldonıı qoldandy degen tórt balýannyń qataryna qosylyp, jarystan shettetilgen. Biraq oǵan týrnırge qatysýǵa qaıtadan ruqsat etildi. Ol «Qazaqstan barysy» jobasynyń fınaldyq kezeńinde shırek fınalǵa deıin jetti. Osy synda ol Ońtústiktiń balýany Jumanazar Ersultanovqa ese jiberdi.
Jalpy, bıylǵy týrnırde jaqsy óner kórsetken balýandar kóp boldy. Sonyń ishinde Jambyl oblysynyń ókili Dáýlethan Jaqypovty aıtýǵa bolady. Ol ádemi tásilder jasap, kórermender kózaıymyna aınaldy. Sonymen birge, Jambyl oblysynyń taǵy bir balýany – Aıbol Aıtbektiń de kúresi kópshiliktiń kóńilinen shyqty. Ol týrnırde birinshi ret jartylaı fınalǵa deıin jetip, qola belbeý aldy. Al onyń jerlesi Beıbit Ystybaev taǵy da týrnırdiń jeńimpazy atandy. Ol fınalda Ońtústik Qazaqstan oblysynyń balýany Jumanazar Ersultanovty jeńdi. Sóıtip, oǵan 25 000 000 teńge, altyn taıtuıaq pen Astanadan bir bólmeli páter berildi. Ekinshi oryn alǵan Ersultanovqa 5 500 000 teńge, úshinshi oryn alǵan Aıtbekke 1 800 000 teńge kóleminde syılyq tabys etildi.
Dastan KENJALIN,
«Egemen Qazaqstan»
