Aıshyqty tartý

Ulttyq mýzeıde Astana kúni merekesi qarsańynda «Kamıl Mýllashevtyń retrospektıvasy. Meniń zamanym» kórmesi saltanatty jaǵdaıda ashyldy. Qylqalam sheberiniń tańdaýly týyndylary usynylǵan kórmede Ulttyq mýzeıdiń dırektory Darhan Myńbaı avtordyń eńbekterine joǵary baǵa bere kelip: «Kamıl Mýllashevtyń esimi óz elimizde ǵana emes, alys-jaqyn shetelderde de keńinen tanymal. Ol tól týyndylarynda balalyq shaǵynan bastap búgingi tańǵa deıingi ómir baspaldaqtaryn kórkem tilmen kósile beınelegen. Odan bólek, avtordyń shyǵarmashylyq jumystarynan qazaqy boıaýdy, qazaqy minezdi ańǵarýǵa bolady. Onyń eńbekteri sonysymen de qundy. Kamıl aǵamyzdyń týyndylary Ulttyq mýzeıden oryn alyp, kópshiliktiń kózaıymyna aınalyp jatqanyna óte qýanyshtymyz, – dedi. Astana qalasy ákiminiń orynbasary Ermek Amanshaev kórmedegi týyn­dy­lardyń kórkemdik mánine toqtala kele, sýretshige shyǵarmashylyq tabystar tiledi. – Mundaǵy týyndylardyń qaı-qaısysy da adamnyń qyzyǵýshylyǵyn týdyrmaı qoımaıdy. Kamıl aǵamyzdy elimizdiń eńbek sińirgen qaıratkeri retinde jaqsy bilemiz. Sheberhanasynda san ret bolǵanmyn. Onyń týyndylary rasymen joǵary baǵaǵa ıe. Kamıl Mýllashev – qazaq beıneleý óneri jolynda ózindik qoltańbasy bar talantty sýretshilerdiń biri. Sondyqtan avtor qandaı qurmetke de laıyq, – dedi E.Amanshaev. Sonymen qatar, kórme avtory K.Mýllashev shyǵarmashylyq jumys­tarynyń erekshelikteri týraly baıandaı kelip, óner jolynyń qyr-syryna toqtaldy. – Astana kúnine oraı arnaıy daıyn­daǵan kórmemnen túrli janrdaǵy týyndylarymdy tamashalaı alasyzdar. Olardyń ishindegi, ásirese halqymyzdyń tynys-tirshiligi, shynaıy eńbek jolyn­daǵy erlik-ónegeleri týraly jaýharlar arqyly janyńyz nurlanady. Men úshin 1990-2000-jyldar óte jemisti boldy. Osy jumystarymnyń barlyǵy derlik birneshe elderdiń aýyr kezeńderinen habar beredi. Onyń bárin sýret arqyly beıneleý rasymen de ońaıǵa túsken joq, – dedi kórmeniń ashylý saltanatynda oı bólisken avtor. Merekelik is-sharaǵa Reseı, Qytaı, Tatarstan elderiniń elshileri, zııaly qaýym ókilderi, qoǵam qaıratkerleri, ǵalymdar men ónertanýshylar qatys­ty. Al, óner ıesi týraly qysqasha maǵ­lumat bersek, ol – Qazaqstannyń eńbek sińir­gen qaıratkeri, Tatarstannyń Ǵabdolla Toqaı atyndaǵy Memlekettik syı­lyǵynyń laýreaty, Fransııa kórkemóner akademııasynyń kúmis medaliniń ıegeri, Qytaı О́ner akademııasynyń akademıgi.  Onyń týyndylary Memlekettik Tretıakov galereıasynyń, Á.Qasteev atyn­­­daǵy Memlekettik mýzeıdiń qor­la­rynda saqtaýly. Sonymen qatar Qa­zaq­­stannyń jeke kolleksııalarynan jáne AQSh, Fransııa, Germanııa, Lıh­tenshteın, Túrkııa, Qytaı jáne t.b. shet­elderdiń galereıalarynan kezdesedi. Aıta ketý kerek, kórme 1 tamyzǵa deıin jalǵasatyn bolady. Qarshyǵa KÚLEN