Qarmaqqa «torǵaı» balyq tústi

Qostanaı óńirinde balyqshylar torýyldaıtyn kólder jetkilikti. Altynsarın aýdanyndaǵy Sygan kólinen de demalystyń osy túrin unatatyndar oljasyz qaıtpaıdy. Kánigi balyqshylardyń biri Alek­sandr Shıbanov oljasyna ózi tań­ǵaldy. Onyń qarmaǵyna túsken móńke balyqtyń basy balyqtan góri torǵaıǵa kóbirek uqsaıdy. – Men bala kezimnen balyq aýlaımyn. Alpys jylǵa jaqyn ýaqyt ishinde qarmaǵyma qandaı balyq túspedi deısiz. 6 kılogramm shortan, 1,5 kılogramm tartatyn móńke balyq ustaǵan kezderim boldy. Biraq qarmaǵyma qandaı iri balyq ilingende de dál bulaı tańǵalmaǵan edim, – dep aǵynan jaryldy balyqshy A.Shıbanov. Alaıda ol balyqtyń torǵaıǵa uqsaǵan tumsyǵyn jaratylystyń «qateligi» dep otyrǵan joq. – Móńke balyq buryn qarmaqqa ilinip qalyp, julqynǵanda qaıta shyǵyp ketken bolýy kerek. Sodan qarmaq qaýyp, zaqymdanǵan aýyzy qısyq óskende, torǵaıdyń tumsyǵyna uqsap ketken ǵoı, – dep túsindirdi balyqshy. Osy saparynda balyqshynyń qarmaǵyna «torǵaı» balyqtan basqa eshteńe túspepti. Aýa raıy qolaı­syz kezde balyq qarmaq qappaıdy. Ánsheıinde shelektep balyq aýlaıtyn Aleksandr bul joly ókingen joq, oǵan «torǵaı» balyqtyń qyzyǵy da jetip-artyldy. Qostanaıǵa kelgen soń ol jaqyn týys­tary men dostaryna, kórshi-kólemine kórsetip, jurtty da máz qyldy. Názıra JÁRIMBETOVA, «Egemen Qazaqstan» QOSTANAI