Tarıhı oqıǵaǵa qaıta oıyssaq. Sol jyly mektep oqýshylary arasynda jas Astananyń sımvoly bolýǵa laıyq arýdy anyqtaý úshin konkýrs uıymdastyryldy. 200 úmitker synǵa túsken saıysta №31 mekteptiń shákirti Mádına Zakırova laıyq dep tanyldy.
– Árıne, bul Astana tarıhyndaǵy aıtýly kún. Otandyq dızaınerler maǵan arnap ádemi kóılek tikti. Sol keshte elimizdiń tanymal ánshileri Baýyrjan Isaev pen Naǵıma Esqalıeva «Astananyń alǵashqy tańy» ánin shyrqaǵanda, Prezıdentke gúl shoqtaryn usyndym. Qobaljyǵanym ras. Biraq, «jas Astananyń sımvoly», «Eýrazııa arýy» dep habarlap jatqanda boıymdy tiktep, tek alǵa qaraı umtyldym, – dep eske alady Mádına.
Mádınany alǵash kórgende, tańdanyp qaldyq. Sol baıaǵy sulý qyz. Astanamen birge qulpyryp, jyl ótken saıyn jasarǵandaı. Aıtýynsha, mektep bitirgen soń zańger mamandyǵy boıynsha joǵary bilim alǵan. Oqýyn támamdaǵannan keıin túrli sán agenttikterinen birlesip jumys isteýge shaqyrtý alypty. Alaıda, bárinen bas tartyp, ulttyq kompanııaǵa jumysqa ornalasady. Maqsaty – óz salasynyń mamany bolý. Keıinnen ómirlik jaryn jolyqtyryp, turmysqa shyǵady.
«Qyzdyń basty maqsaty – kelin bolý. Ata-anamnan alǵan tárbıem ǵoı, óz otbasymnyń, óz balalarymnyń bolǵanyn qaladym. О́ıtkeni, sábıdi ómirge ákelý bar, al ony tárbıelep, azamat qataryna qosý úlken jaýapkershilikti qajet etedi» deıdi ol.
Mádına ınjenerler otbasynan shyqqan. Ákesi Qanat Bazkenuly Astanaǵa eńbegi sińgen ınjener. Sonaý elorda qurylysy qaınap turǵan shaqta onyń jetekshiligimen birneshe turǵyn úıler, zaýyttar, kombınattar salynǵan. Al, anasy Márııash Kósherbaıqyzy «Selınograd tıajstroı» kásiporynynda talaı jyl jumys istegen. Qazir jeke kásippen aınalysady.
Búginde Mádınanyń ózi О́skenbaevtar áýletiniń kelini. Kópbalaly ana. Joldasy Almaz ekeýi eki ul, eki qyz tárbıelep otyr. Árıne, balalaryna bas-kóz bolyp, olardy erkeletetin ata-enesiniń baryna shúkirshilik aıtady.
– Bir áýletke jańadan kelin bolyp túskennen keıin, sińisip ketýiń kerek. Bul rette anam Márııash pen dúnıeden ótken ákem Qanatqa qaryzdarmyn. Olardyń ómir boıy bergen bilimi, tálim-tárbıesiniń arqasynda súıikti kelin atandym. Allaǵa shúkir, ata-enem de jaqsy adamdar. Meni óz qyzdaryndaı baýyryna basty. Bilmegenimdi úıretti. Eń bastysy otbasymyzda bereke bar, – deıdi ol.
Negizinde, О́skenbaevtar áýleti astanalyqtarǵa etene tanys. Áýlettiń ákesi Bolat Aıtpaıuly О́skenbaev zeınet demalysyna shyqqansha quqyq qorǵaý organdary salasynda eńbek etken. Astana qalasy Jol polısııasy basqarmasynyń bastyǵy bolǵan. Elordanyń gúldenýine, joldaǵy tártipti qadaǵalaýǵa úles qosqan azamat. Zaıyby Mánshúk Serikpaıqyzy bilikti dáriger, bar ǵumyryn medısına salasyna arnap keledi.
– «Adam urpaǵymen jasaıdy», táp-tátti nemerelerimizdiń quldyrańdap júgirgeni qýantady. Árbir jetistigine máz bolamyz. Balam men kelinimniń úlken qyzy Aıdana 6-synypqa ótti. Atqa mingendi unatady. Tigin tigip, anasyna taǵamdar daıyndaýǵa kómektesedi. Odan keıingi nemerem Álmansur 3-synypqa kóshedi. О́zi fýtbolmen áýestenedi. Bıyl 1-synypqa baratyn Abdýlmálik te sportqa qumar, onyń ishinde karate jáne hokkeı úıirmelerine baryp júr. Al, eki jastaǵy kishkentaı erke Ámınamyz kóz-qýanyshymyz. Inabatty kelin – ulttyń uıytqysy, dep jatamyz ǵoı. Bizdiń áýlettiń shyn janashyry, jasy kelgen kisini syılap, jan-jaǵyna izettilik tanyta bilgen Mádınany biz de maqtan tutamyz, – deıdi Mánshúk apaı.
Áńgime arasynda, Mádına elordany janyndaı jaqsy kóretinin aıtty. Qalamyzdyń jetken árbir jetistigine shyn qýana biletin patrıot jandardyń qatarynda ekenin jasyrmady.
– Astana kóz aldymyzda kórkeıýde. Halyqaralyq jıyndardyń ortalyǵyna aınalyp úlgerdi. Turǵyndardyń jaıly ómir súrýine barynsha jaǵdaı jasalýda. Ásirese, balalarymyzdyń bolashaǵy zor bolady dep oılaımyn. Elordanyń árbir turǵyny baqytty bolsa eken dep te armandaımyn. Elime tek beıbitshilik, jaqsylyq tileımin, – deıdi aǵynan jaryla.
Astananyń tusaýkeser rásiminde Mádına kıgen kóılektiń ereksheligi – matadan tigilmegendigi. Qolmen toqylǵan. Krınolın, móldir monshaq, túrli-tústi usaq tastarmen áshekeılengen. Ári jibek kestemen órnektelgen. 36 tústen turatyn kóılek paıetka jáne venesııalyq bısermen toqylǵandyqtan erekshe jarqyraıdy. Salmaǵy – 9 keli.
Qazaqstanda eń alǵashqy ashylǵan «OHI» sán úıiniń bul kóılegi tarıhı eksponat dep tanylǵan. «Astana-Eýrazııa arýy» kompozısııasy retinde kúni keshege deıin Prezıdent mádenıet ortalyǵyna kelýshilerdiń nazaryn aýdartty. Bir qyzyǵy, qazaqstandyq on sheberdiń qolynan shyqqan týyndy jumysyna segiz aı ýaqyt ketken kórinedi. Quny sol jyldary Astanadaǵy úsh bólmeli páterdiń baǵasyna teń túsken. Avtory ári bas dızaıneri – Oksana Korbı-Shamına.
2000 jyly Máskeýde ótken «HHI ǵasyr – jańa Reseı» atty halyqaralyq kórmede «Qazirgi zamanǵy Qazaqstan tarıhy» sán kolleksııasyna engen atalmysh kóılek joǵary baǵalanǵan. Fransýz sán qaýymdastyǵynyń prezıdenti Sharl de Kostel-bajaka festıvaldiń arnaýly júldesimen marapattaǵan. Osy baıqaýdan keıin tarıhı sáttiń kýásine aınalǵan kóılek burynǵy Prezıdent mádenıet ortalyǵyna tapsyrylǵan eken.
Gúlmıra AIMAǴANBET,
jýrnalıst
