Kórshi elmen yntymaqtastyq arta túspek

Qazaqstan Respýblıkasy Premer-Mınıstriniń birinshi orynbasary Baqytjan Saǵyntaev Beıjińde QKP OK Saıası bıýrosy Turaqty komıtetiniń múshesi, QHR Memlekettik keńesiniń vıse-premeri Chjan Gaolımen kezdesý ótkizdi, dep habarlady Premer-Mınıstrdiń baspasóz qyzmeti. Atalǵan kezdesý Qazaqstan Prezıdenti Nursultan Nazar­baev­tyń qyrkúıektiń basyndaǵy Qytaıǵa sapary jáne Hanchjoý qalasyndaǵy G20 sammıtine qatysý qarsańynda ótkizilip otyr. Baqytjan Saǵyntaev pen Chjan Gaolı Qazaqstan Prezıdenti Nur­sultan Nazarbaev jarııalaǵan «Nur­ly Jol» jańa ekonomıkalyq saıasaty jáne QHR Tóraǵasy Sı Szın­pın­niń «Bir beldeý, bir jol» basta­masy sheńberindegi jobalardy jú­zege asyrý joldaryn talqylady. Ol elder aldynda ózara tıimdi árip­tes­tiktiń jańa perspektıvalaryn ashatyn bolady. 2020 jylǵa deıin ekijaqty taý­ar aınalymyn 40 mlrd. AQSh dol­laryna deıin jetkizý jóninde eki el kóshbasshylary alǵa qoıǵan min­­detti júzege asyrý maqsatynda Qazaq­­stan Respýblıkasy Premer-Mı­nıstriniń birinshi orynbasa­ry saýda kedergilerin joıý j­ónin­­­degi erejelerdi qarastyra otyryp, Saýda-ekonomıkalyq yq­pal­­dastyqty ártaraptandyrý bo­ıyn­­sha is-qımyldardyń birlesken baǵ­­dar­lamasyn ázirleýdi usyndy. Kelissózder barysynda son­daı-aq, ın­novasııalyq yntymaq­tastyq, keń aýqymdy kólik, ener­getıka sal­a­­syndaǵy, aýyl sharýa­shy­lyǵyn­daǵy jobalar sheńberindegi ózara is-qımyldar máselesi de talqy­lan­dy. QHR-ǵa sapary sheńberinde Pre­mer-Mınıstrdiń birinshi orynbasary Sıan qalasynda bolyp, Shensı provınsııasy partkomynyń hatshysy Loý Sınszıanmen kelissózder júrgizýdi, Qytaı bıznesi ókilderimen kezdesýdi, joǵary tehnologııalar, aeroǵaryshtyq taldamalar, bıofarmasevtıka, AО́K salalaryndaǵy tehnologııalyq ortalyqtarmen tanysýdy josparlap otyr.