Baıqaý qorytyndysy shyǵaryldy

Keshe Syrtqy ister mınıstrligi men Qa­zaq­stannyń Bas redaktorlar klýby «Qazaqstan sheteldik BAQ kózimen» atty III Halyqaralyq baı­qaýdyń qorytyndysyn shyǵardy. Osy jylǵy uıymdastyrý komıtetine 29 elden kelip túsken 60 ótinimniń arasynan qazylar alqasy TMD, Eýropa, Amerıka, Azııa, Taıaý Shyǵys jáne Afrıka boıynsha bes jeńimpazdy anyq­tady. Qazylar alqasynyń qura­myna Syrtqy ister mı­nıstri Erlan Ydyrysov, Syrt­qy ister mınıstriniń oryn­basary Roman Vasılen­ko men Bas redaktorlar klýbynyń prezıdenti Bıbigúl Jeksembaı kirdi. E.Ydyrysov  bıyl baı­qaý­ǵa túsken ótinimderdiń sapa­sy men elimizdiń damý ser­pi­nine, Astanada bola­tyn EKSPO-2017 halyq­aralyq mamandandyrylǵan kórmesi men Almatyda bolatyn Qysqy Ýnıversıada oıyndary sekildi aldaǵy iri halyqaralyq is-sharalarǵa sheteldik BAQ tarapynan qyzyǵýshylyqtyń ósip kele jatqanyn atap ótti. «Osy jyly baıqaýymyzǵa álemniń tórt buryshynan kelip túsken ótinimder sanynyń, eń bastysy – olar­dyń sapasynyń artqany bizdi súısindirdi. Álemdegi BAQ-tarda Qazaqstannyń áleýmettik-ekonomıkalyq jáne saıası damýyna, onyń halyqaralyq qatynastaryna degen qyzyǵýshylyqtyń udaıy artýy baıqalýda. Bul Qazaqstannyń jáne Elbasy Nursultan Nazarbaevtyń ashyq saıasatynyń naqty jemisi dep bilemin», – dedi E. Ydyrysov. Qazylar alqasy TMD avtor­larynyń arasynan Reseı­diń «Argýmenty ı fak­ty» aptalyq gazetiniń til­shisi Marına Nabatnıkovany «Damý úshin jaralǵan. Qazaq­stanmen saýda-ekonomı­kalyq qarym-qatynastar qalaı damyp keledi?» atty maqalasy úshin marapattaý týraly sheshim qabyldady. Eýropalyq avtorlar arasynan HuffingtonPost.fr onlaın-basylymynda jarııalanǵan «EKSPO-2017: bolashaq energııasy qandaı bolady?» maqalasy úshin fransýz jýrnalısi Paýlın Gavrılov marapattaldy. Qazylar alqasy Amerıka qurlyǵynan jeńimpaz bolyp Washington Times gazetinde jarııalanǵan «Bolashaq» órshil baǵdarlamasymen shetelde oqıtyn qazaq jastary burynǵy Keńes respýblıkasyn kóterýge múddeli» atty maqalanyń avtory, AQSh jýrnalısi Dýglas Berton tanyldy. Al Taıaý Shyǵys jáne Afrıka elderi úmitkerleriniń arasynan «The Jordan Times» gazetinde jarııalanǵan «Iordanııa men Qazaqstannyń álemdegi beıbitshilikke degen kóz­qa­rasy ortaq» atty maqalasy úshin Iordanııa jýrnalısi Mohammed Gazal (Mohammad Ghazal) marapattaldy. Azııa elderi úmit­ker­leriniń arasynan «Yeni Cag» gazetinde jaryq kórgen «Eýrazııa kilti Qazaqstannyń damýy men turaqtylyǵynda» maqalasynyń avtory, Túr­kııa jýrnalısi Kýrshad Zorlý jeńimpaz atandy. Jeńimpazdardan basqa bes óńirdiń árqaısysynda qo­symsha júldegerler anyq­taldy, olardyń avtorlary  qazylar alqasynan alǵys hat­taryn alatyn bolady. Baıqaý jeńimpazdary qyr­kúıek aıynyń basynda Astana men Almaty qala­laryna jáne Býrabaı kýrortyna sapar shege alady. Joldybaı BAZAR, «Egemen Qazaqstan»