Májilis depýtaty Qarataýdyń halqymen kezdesti

Parlament Májilisiniń depýtaty, «Nur Otan» fraksııasynyń múshesi Baqytjan Ábdiraıymov Qarataý qalasyndaǵy «Sholaqtaý» ken ornynyń jumysymen tanysyp, eńbekkerlerimen júzdesti. Aımaqtaǵy ǵana emes, elimizdegi iri óndiris oshaqtarynyń biri sanalatyn «Qazfosfat» JShS-ine qarasty «Sholaqtaý» óndiris alańynda búginde 535 adam eńbek etip jatyr. «Qazfosfat» zaýyty jylyna 1 mln. 744 myń tonna fosforıt shyǵaratyn bolsa sonyń 40 paıyzyn osy ken orny beredi. Bıylǵy jyldyń jeti aıynda bul alyp kásiporyn memleket qazynasyna 1 mlrd. teńgeden astam salyq tólepti. 2011-2015 jyldar aralyǵynda kásiporynǵa 2,5 mıllard teńge ınvestısııa quıylǵan. Osynyń arqasynda kóptegen jańa tehnıkalar alynyp, zaýyttyń qural-jabdyqtary jańardy. Tarıhy sonaý 1946 jyldan bastaý alatyn «Sholaqtaý» ken ornynyń jumysy bir kúnde toqtaǵan emes. Buryn fosforıt ashyq ádispen óndiriletin bolsa, qazir 300 metr tereńdiktegi shahtadan qazylyp alynady. Bul kásiporyndaǵy jumysshylardyń barlyǵy derlik jergilikti turǵyndar. Jumysshylardyń ortasha jalaqysy 93 myń teńgeni quraıdy. «Qazir elimizdegi óndiris oshaqtaryna memleket tarapynan úlken qoldaýlar bolyp jatyr, – deıdi zaýyt jumysshylarymen júzdesken Májilis depýtaty Baqytjan Jarylqasynuly. – Sońǵy tehnologııalardy paıdalana otyryp óndiristi jańa deńgeıge kóterý mindeti kún tártibinen esh túsken emes. Kásiporyn jumysynyń alǵa basýy árıne, basshylarǵa da baılanysty. Degenmende sizderdiń qajyrly eńbekterińiz zaýyttyń damýyn jedeldete túsedi». Bul kúni Májilis depýtaty Baqytjan Ábdiraıymov «Nur Otan» partııasynyń fılıalynda jergilikti turǵyndardy qabyldap, aryz-shaǵymdaryn tyńdady. Aýdan turǵyndary bir kezderi zııandy sehtarda jumys istep, ýaqyt óte kele múgedek bop qalǵan ǵarip jandardyń muńyn, Qarataý qalasyndaǵy jol, kópqabatty turǵyn úılerdi jóndeý máselesin ótkir qoıdy. Halyq qalaýlysy turǵyndardyń aryz-shaǵymyn muqııat tyńdap, bul máselelerdi sheshý úshin tıisti oryndarǵa hat joldaıtynyn aıtty. Oralhan DÁÝIT Jambyl oblysy