«Nur Otan» partııasy Tóraǵasynyń birinshi orynbasary Muhtar Qul-Muhammed Aqmola oblysyna jumys saparyn Elbasynyń memlekettik baǵdarlamalarynyń oryndalý barysyna arnady.
Ol eń aldymen oblys ákimi Sergeı Kýlagınmen birge Shýche qalasyndaǵy qazaq tilinde oqytatyn baıyrǵy mektep-ınternattyń kúrdeli jóndeý jumystarymen tanysty. Ǵımarattyń irgetasy 1949 jyly qalanǵanymen osy ýaqytqa deıin keshendi jóndeý kórmegen eken. Bıylǵy jyly «Jumyspen qamtýdyń jol kartasy-2020» baǵdarlamasynyń aıasynda ǵımaratty jańartýǵa 167 mıllıon teńge bólindi. 1 qarashaǵa taıaý jumys aıaqtalýǵa tıis.
Atalǵan baǵdarlama negizinde 2016 jyly Aqmola oblysyna 4 mıllıardqa jýyq teńge bólindi. Bul qarjyǵa bilim berý, densaýlyq saqtaý jáne áleýmettik ınfraqurylymdardyń 33 nysanyn jóndeý kózdelip otyr.
Býrabaı aýdanynyń Kenesary aýylyndaǵy egistik alqapty aralap, dıqandarmen áńgimelesken Muhtar Abraruly Aqmola oblysy – Qazaqstannyń eń negizgi astyqty aımaqtarynyń biri ekendigin atap ótti. Ol: «Jyl saıyn bul ólkedegi bıdaı jınaýdyń esebi mıllıondaǵan tonnamen ólshenedi. Bıylǵy jyly da ónim mol bolady degen senimdemiz», – degen izgi tilegin bildirdi.
«Nur Otan» partııasy Tóraǵasy birinshi orynbasarynyń fermerlermen kezdesýi eń aldymen Jer reformasy jónindegi komıssııa jumysynyń nátıjesine arnaldy. Uzaqqa sozylǵan jalpyhalyqtyq suhbattasýdyń qorytyndysynda pysyqtalǵan usynystarmen aqmolalyq eginshiler de kelisip otyr. Atap aıtsaq, M.Qul-Muhammed alqabynda bolǵan sharýa qojalyǵynyń basshysy Serik Omarov: «Jerdiń naǵyz ıesi oǵan uqyppen jáne jaýapkershilikpen qaraýy tıis, sol kezde Jer-Ana búgingi ǵana emes, keler urpaqqa da mol tabys ákeletin bolady», – degen oıyn jetkizdi.
Muhtar Abraruly tájirıbeli sharýanyń ustanymyn qoldap, Serik Omarovtyń sharýashylyq qojalyǵynyń tabysy, onyń aıtqan sózderiniń aıqyn dáleli bolyp tabylatynyn atap ótti. Fermerdiń ıeliginde 1254 gektar ǵana jer bar. Soǵan qaramastan, ol «nóldik», ıaǵnı eń zııansyz jer qyrtysyn óńdeýdi engizdi, fermany ozyq nemis tehnologııasymen jáne jabdyǵymen jaraqtandyrdy. Osynyń nátıjesinde jyl saıyn bıdaıdan ǵana emes, sondaı-aq, zyǵyrdan, kartoptan, kókónisten de mol ónim jınaýda.
– Keıbireýlerdiń ár fermer ondaǵan myń aýyl sharýashylyǵyna arnalǵan jerlerdi jalǵa alǵan degen turǵydaǵy qate kózqarasy bar, – dedi partııa Tóraǵasynyń birinshi orynbasary alqap basyndaǵy áńgime barysynda. – Shyntýaıtynda, Omarovtyń sharýa qojalyǵy sııaqty olardyń basym kópshiligi 1 myń nemese 2 myń gektar jerdi ǵana jalǵa alyp otyr. Alaıda, Elbasynyń qoldaýymen astyqty jáne maıly daqyldarǵa, tuqym daıyndaý sharýashylyǵy men asyl tuqymdy mal ósirýge, sondaı-aq, dızel otynyna berilgen kómek qarjysynyń arqasynda olar tabysqa jetip qana qoımaı, jyl saıyn jumystaryn jandandyra túsýde. Tap osyndaı uqypty sharýalarǵa jerdi senip tapsyrýǵa ábden bolady. Jer reformasy solardyń muqtajdyǵyn qamtamasyz etýge baǵyttalǵan. Jyl saıyn memleket birneshe baǵdarlamany iske asyrý aıasynda Aqmola óńirine ondaǵan mıllıard teńge ınvestısııa quıady. Bul qarjynyń óz maqsatynda jumsalyp, tolyq kólemde ıgerilýi qatań baqylaýda bolady.
Muhtar Abraruly baǵdarlamalyq qarjylardyń tıimdi jumsalýyna aıryqsha kóńil bóldi. Al oblys ákimi S.Kýlagın qazirgi kúni óńirde aýqymy jaǵynan teńdesi joq «Nurly Jol» ınfraqurylymdy damytýdyń baǵdarlamasy keń kólemde iske asyrylýda ekendigin baıandady.
Kókshetaý qalasyndaǵy «Kóktem» shaǵyn aýdanynda qazir jylý júıesi jańǵyrtylyp, qaladaǵy eń iri balabaqsha paıdalanýǵa berilý qarsańynda. Memleket bul jobaǵa 678 mıllıon teńge baǵyttap otyr. Sýmen qamtý jáne káriz júıeleriniń jańǵyrtylý barysymen tanysqan M.Qul-Muhammed qurylys jumystaryna kóńili tolatynyn bildirdi.
– Elbasymyzdyń «Nurly Jol» baǵdarlamasy jahandyq ekonomıkalyq daǵdarys jaǵdaıynda el ekonomıkasynyń damýyna eseli ekpin qosty. Atalǵan baǵdarlama negizinde respýblıkada 770 mıllıard teńge ıgerilip jatsa, Aqmola oblysyndaǵy respýblıkalyq jáne oblystyq uıymdar ǵana 57 mıllıardtan astam teńgeniń jumysyn atqarýy tıis. Bul osydan on jyl burynǵy Aqmola oblysynyń bıýdjetinen de kóp, – dedi partııa Tóraǵasynyń birinshi orynbasary.
Tekserýlerdiń nátıjesi kórsetkendeı, «Nur Otan» erekshe nazar aýdaratyn máseleler áli de jetkilikti. M.Qul-Muhammed oblystaǵy partııa belsendilerimen kezdesý barysynda bul jóninde keńinen áńgimeledi. «Bıylǵy 2016 jyl elimizdiń qoǵamdyq-saıası ómirindegi aıryqsha mańyzdy oqıǵa – Qazaqstan Táýelsizdiginiń 25 jyldyǵyn atap ótýimizben erekshelenedi, – dedi partııa Tóraǵasynyń birinshi orynbasary. – Elbasy Nursultan Ábishuly Nazarbaevtyń basshylyǵymen osynaý qysqa merzimde halyqaralyq qoǵamdastyq tarapynan qurmet tuǵyryna kóterilgen ómirlik mańyzdy qaıta qurýlar men reformalar júzege asyryldy. Biz tıimdi saıası jáne ekonomıkalyq júıeni qalyptastyryp, damytýǵa qol jetkizdik. Qazaqstan halqy bolashaqqa úlken josparlarmen senimdi qadam basýda. «Nur Otan» partııasy halyqtyń orasan zor senimine ıe bolyp, jańa dáýir jańǵyrtýlaryna salmaqty úles qosýda. Muny Aqmola oblysynyń búgingi tolaıym jetistikterinen de ańǵarýǵa bolady.
Oblys áleýmettik-ekonomıkalyq damýdyń 1 tamyzdaǵy kórsetkishteri boıynsha tórt salada respýblıkamyzda birinshi oryndy ıelengen. О́ńir ónerkásip ónimin shyǵarýda kósh bastap, 104,6 paıyzdyq deńgeıge jetipti. Sondaı-aq, oblys taýar aınalymy, tutyný quny jáne turǵyn úılerdi paıdalanýǵa berýde úzdik shyqqan. Buǵan qosa, shaǵyn jáne orta bıznesti órkendetý, negizgi kapıtalǵa ınvestısııa quıý, aýyl sharýashylyǵynyń jalpy óniminde de jaqsy kórsetkishter bar eken.
Budan keıin Muhtar Abraruly partııalyq qyzmettiń memlekettik jáne qoǵamdyq ómirdegi yqpaly men mindetterine toqtaldy. «Bizdiń «Qazaqstan-2021. Birlik. Turaqtylyq. Jasampazdyq» atty saılaýaldy baǵdarlamamyzda bes ınstıtýttyq reformany júzege asyrýǵa baǵyttalǵan Ult Josparynyń «100 naqty qadamy» negizgi ıdeıalyq ustanym sanalady. «Nur Otan» partııasynyń aldynda ındýstrııalandyrý, kásipkerlerdi qoldaý, turǵyndardy jumyspen jáne baspanamen qamtý sııaqty úlken mindetter tur», – dedi M.Qul-Muhammed.
Partııa «Nurly Jol» baǵdarlamasyn» júzege asyrýǵa baǵyttalǵan qarjynyń maqsatty jumsalýyn tekseretin bolady. Aqmola oblysynda baǵdarlama jobalaryn qarjylandyrýǵa 60,1 mıllıard teńge bólingen. «Bıznestiń jol kartasy-2020» baǵdarlamasynyń nysandaryna ınfraqurylymdar tartýǵa 2016 jyly 169 mıllıon teńge qarastyrylsa, sonyń 30 paıyzy ǵana ıgerilgen. «Báıterek Development» júıesi boıynsha jalǵa alý jáne nesıelik turǵyn úı qurylysyna arnalǵan 1,6 mıllıard teńge qarjy konkýrstyq resimderdiń uzaqqa sozylýy saldarynan ıgerilmeı otyr. Barlyq deńgeıdegi máslıhattardaǵy partııa fraksııasy bul máselelerdi qatań baqylaýǵa alýy tıis.
Partııanyń ortalyq apparaty men aımaqtyq fılıaldary jýyq arada partııanyń kadrlyq rezervin qalyptastyrýǵa kirisedi. Bul baǵytta qajetti qujattar daıyndalyp, túsinik jumystary júrgizildi. Osy oraıda partııa jastarǵa da keń múmkindik beretin bolady.
Sóziniń sońynda Muhtar Qul-Muhammed elimizdegi áleýmettik saıasattyń negizgi baǵyttaryna sholý jasap, partııa alǵa qoıǵan negizgi mindetterge toqtaldy.
Baqbergen AMALBEK,
«Egemen Qazaqstan»
Aqmola oblysy
