Qazaqstannyń qolóner sheberleri EKSPO-2017 kórmesine qazirden bastap daıyndalýy qajet. Sebebi, irikteý kezinde taýardyń tırajyna ǵana emes, sapasyna da, ony usynýdyń kreatıvti, ıaǵnı erekshe tásilderine de basa nazar aýdarylady. Osy oraıda mamandar qolóner kásibine bıznes kózi retinde qaraýǵa keńes berip otyr. Ázirshe kórmede usynylatyn ulttyq qolóner buıymdaryn irikteýdiń naqty talaptary joq. Alaıda, «Astana EKSPO-2017» ulttyq kompanııasynyń ózindik kózqarasy, belgili bir usynystary bar. Bálkim, sonyń barlyǵyn «EXPO&WOMEN» Halyqaralyq uıymy iske asyratyn bolar.
Búgingi josparǵa sáıkes, EKSPO kórmesi kezinde etnoaýyl ashylady. Sol jerde qazaqtyń ulttyq qolóner buıymdaryn satý josparlanǵan. Alaıda, oǵan kóp adam syımaıtyn sııaqty. Sondyqtan, etnoaýylda saýda oryndary az bolady. Shamamen, 30-35 oryn. Degenmen, ol jerdegi taýarlardyń sany da, sapasy da joǵary bolýy shart. Sondaı-aq, qolóner buıymdaryn tanystyrýdyń ózindik bir tásili bolǵany jón. «Etnoaýylda kádimgideı qazaqy ortany jasaý qajet. Tamaǵy da, taýary da ulttyq naqyshta bolsa eken deımiz. Sosyn qolóner buıymdaryn jaı bazardaǵy sııaqty qoıa salmaı, sol buıymdardyń qalaı jasalatynyn kórsetý kerek. Mysaly, kilem satylsa, ony bireý toqyp otyrady. Jip ıiredi, qyshtan ydys jasaıdy, oıý salady, keste tigedi. Eń bastysy, qazaqtyń tynys-tirshiligin, tarıhy men mádenıetin jan-jaqty kórsetý kerek. Bálkim, biz ol jerde rotasııa júıesin qoldanamyz. Ondaıda bir aı bir sheber otyrsa, ekinshi aıda ekinshi bir sheber kelip, óz taýaryn sata alady. Osylaısha, qolóner sheberlerin kóptep qamtýǵa bolady», – deıdi «Astana EKSPO-2017» ulttyq kompanııasy kommersıalızasııalaý departamenti dırektorynyń orynbasyry Ilııas Orazaqov. Osy oraıda kompanııa ókili EKSPO logotıpimen satylatyn keńse zattary, gadjet qosymshalary, kádesyılar jáne taǵy basqa usaq-túıekterdi qolóner buıymdarymen shatastyrmaý qajet dep otyr. Sebebi, jarnamalyq taýarǵa salyq salynsa, qolóner buıymdaryna salyq salynbaıtyn shyǵar. Sheberler tek etnoaýyl aımaǵynda jalǵa alǵan orynnyń tólemaqysyn ǵana tóleýi múmkin.
Búginde «Astana EKSPO-2017» ulttyq kompanııasy qolóner sheberlerin irikteýdi «EXPO&WOMEN» Halyqaralyq uıymyna usynyp otyr. Atalǵan uıymnyń basshylyǵy ol usynysty qabyldap, etnoaýyldyń talaptaryn ázirleýge kelisti. Alaıda eki jaq áli naqty bir qujatqa qol qoıǵan joq.
Negizi, kolóner buıymdaryn satý oryndary tek kórme alańynda ǵana emes, barlyq qala aýmaǵynda da ashylady. Sondyqtan, Astana qalasynyń ákimdigi qoǵamdyq uıymdarmen birlese otyryp, osy saladaǵy otandyq sheberlerdiń áleýetin zerdelep shyǵýǵa múddeli. Oǵan da «EXPO&WOMEN» Halyqaralyq uıymy tartylyp otyr. «Kóktemde biz úlken jármeńke ótkizgen edik. Al qyrkúıektiń 9-10-y kúnderi týra sondaı úlken jármeńke uıymdastyrylady. Oǵan respýblıkanyń túkpir-túkpirinen qolóner sheberleri qatysyp, óz taýarlaryn kórsete alady. Mine, osy ispetti sharalardyń arqasynda biz óz múmkindikterimizdi baıqap kórmekpiz», – deıdi uıym basshysy S.Raqymbekova.
Onyń sózine qaraǵanda, EKSPO-nyń etnoaýylyna irikteý talaptaryn ázirleý úshin birneshe basqosýlardy ótkizip, osy máseleni keńinen talqylap alý qajet. Sebebi taýardyń ózindik ereksheliginen bólek, tırajy da az bolmaýy tıis. Qazirgi kezde respýblıka boıynsha 100-ge tarta qolóner sheberi kórmege qatysýǵa nıetti.
Arman ASQAROV
