Investısııany ıkemdi el ıemdenedi

Álem ekonomıkasy áli de bolsa turaqtylyqqa taban tireı almaı turǵany bel­gili. Sonyń saldarynan qaı elde de tikeleı shetel ınves­tı­sııalary aǵymynyń báseń­deý úrdisi baıqalady. Tipti, ınves­tısııalar úshin úlken báse­kelestik júrýde. Al bul rette ınves­torlar aldy­men ınves­tısııaǵa eń ıkemdi eldi tań­daıtyny belgili. Osy­ǵan oraı bizdiń Úkimet te ahýaldy jaqsartý úshin bel­sendi jumys júr­gizip, ınves­tısııalardyń qaýip­sizdigi men saqtalýyn qamta­masyz etýde. Bul týraly keshe Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda aıtyldy. Elimizdegi ınvestısııalyq ahýal jaıyn arqaý etken baspasóz máslıhatyna Investısııalar jáne damý mınıstrligi Investısııalar komıteti tóraǵasynyń mindetin atqarýshy Rýslan Tasbergenov, Prezıdent janyndaǵy Shetel ınvestorlary keńesi qaýymdastyǵynyń basqarma tóraǵasy Ýlf Vokýrka, «Eksport jáne ınvestısııalar ulttyq agenttigi «Kaznex Invest» AQ basqarma tóraǵasy Borısbıı Janǵorazov jáne onyń orynbasary Almas Aıdarov qatysyp, atqarylyp jatqan jumystardyń baǵytyn, barysyn baıandady. Má­selen, elimizde Kásipkerlik kodek­s­inde ınvestısııalardyń qaýip­sizdigine jáne saqtalýyna kepil­dik beretin erejeler beki­til­gen. Al ınvestısııalar sala­syndaǵy halyqaralyq quqyqtyq bazany jetildirý sheńberinde Investısııalardy kótermeleý jáne ózara qorǵaý týraly 48 keli­simge qol qoıylypty. Sonymen qatar, ınvestorlardyń problemaly máselelerin tez arada sheshý maqsatynda únqatysý alańdary qurylǵan. Olar –Prezıdent janyndaǵy Shetel ınvestorlary keńesi jáne Úkimet janyndaǵy Investısııalyq ahýaldy jaqsartý jónindegi keńes. 2015 jyly Investısııalyq ombýdsmen ınstıtýty qurylǵany belgili. Al aǵymdaǵy jyly Úkimet janynan Investorlardy tartý jáne ınvestısııalyq ahýaldy jaqsartý jónindegi keńes quryldy. Aıtqandaı, júrgizilip jat­qan jumystar halyqaralyq sarap­shylar tarapynan da joǵa­ry ba­ǵalanýda. Mysaly, Dúnıe­jú­zilik ekonomıkalyq forýmnyń Jahandyq básekege qabilettilik týraly esebine sáıkes, Qazaqstan álemniń 140 eliniń arasynda 42-orynǵa jáne TMD elderi arasynda ekinshi orynǵa ıe boldy. Dúnıejúzilik banktiń Doing Business reıtınginde Qazaqstan 41-oryndy ıelene otyryp, ózi­niń jaıǵasymyn 12 tarmaqqa jaq­sartty. 189 el arasynda Dúnıe­júzilik bank tobynyń Doing Business-2016 boıynsha Qazaqstan mınorıtarlyq ınvestorlardy qorǵaý jóninde 25-shi orynǵa jáne Jahandyq básekege qabilettilik reıtıngisi boıynsha ınvestorlardy qorǵaý boıynsha 25-shi orynǵa ıe boldy. Investısııalyq ahýaldy jetildirý sheńberinde qa­byldanatyn aýqymdy is-sharalardyń barlyǵy ınvestorlar úshin qolaıly jaǵdaı jasaý jáne Qazaqstannyń óńirlik ınvestısııalyq hab retinde qalyptasýy úshin engizilýde. Dınara BITIKOVA, «Egemen Qazaqstan»