Foto: Mádenıet jáne aqparat mınıstrligi
Baıqaýǵa qatysýshylarǵa qala mádenıeti, adam taǵdyry, qoǵamdaǵy ózgerister, sondaı-aq ulttyq bolmys pen zamanaýı qundylyqtardyń sabaqtastyǵy taqyryptaryn kórkem týyndylar arqyly jetkizý usynylady.
«Ádebı baıqaýǵa Qazaqstan Respýblıkasynyń azamattary qatysa alady. Qatysý úshin kólemi keminde 10 avtorlyq baspa tabaq (bir avtorlyq baspa tabaqtyń kólemi 40 myń baspa tańbasyn quraıdy) bolatyn, buryn esh jerde jarııalanbaǵan qala taqyrybyndaǵy romandar qabyldanady. Ár avtor bir ǵana shyǵarmasyn usyna alady», delingen habarlamada.
Jeńimpazdardy belgili jazýshylar men qoǵam qaıratkerlerinen quralǵan qazylar alqasy anyqtaıdy. Qorytyndy sheshim ashyq daýys berý arqyly qabyldanady.
Baıqaý qorytyndysy boıynsha úzdik shyǵarmalardyń avtorlary dıplomdarmen jáne aqshalaı syılyqtarmen marapattalady. Sonymen qatar júldeli oryn alǵan týyndylar 15 myń danamen basylyp, elimizdiń kitaphanalaryna taratylady.
Respýblıkalyq baıqaý erejesine sáıkes, jeńimpazdarǵa mynadaı syıaqylar belgilengen:
- Bas júlde – 100 myń dollar;
- I oryn – 75 myń dollar;
- II oryn – 50 myń dollar;
- III oryn – 30 myń dollar.
«Baıqaý jumystary 2026 jylǵy qyrkúıek pen jeltoqsan aılary aralyǵynda qabyldanady. Qujat Astana qalasy, Máńgilik El dańǵyly, 8, 14-kireberis, Qazaqstan Respýblıkasy Mádenıet jáne aqparat mınıstrliginiń mekenjaıy boıynsha ótkizilýi qajet.
Baıqaýǵa qatysý sharttary týraly qosymsha aqparatty +7 (7172) 74 04 07 jáne +7 (7172) 74 04 08 telefon nómirleri arqyly alýǵa bolady», delingen habarlamada.
