Tazalyq Almaty sııaqty megapolıs qaladaǵy basty máseleniń biri. Sondyqtan qala basshylyǵy ǵana emes, qoǵamdyq uıymdar men kompanııalar da tazalyq máselesine at salysyp, túrli sharalar uıymdastyryp keledi.
Almatyda osyndaı sharalardyń biri «Eń úzdik aýla sypyrýshy-2016» baıqaýynyń jeńimpazdary Ortalyq mádenıet jáne demalys saıabaǵynda ótken saltanatty jıyn kádimgideı qalalyqtardyń nazaryn aýdardy.
Bul baıqaýdy «Naǵyz almatysha» qoǵamdyq qory Almaty qalasynyń tabıǵatty paıdalaný basqarmasymen birlese otyryp, «Efes Qazaqstan» ShS AQ-nyń qarjylyq qoldaýymen osymen tórtinshi ret uıymdastyryp otyr.
Bıylǵy baıqaýda birinshi oryndy Bostandyq aýdanynyń aýla sypyrýshysy Nurıahmet Qýandyqov, ekinshi oryndy Álııa Qońyrova (Áýezov aýdany) ıelendi. Úshinshi oryn úsh jeńimpazǵa berildi, olar – Orynbaı Janjigitov, Qasymjan Mámetbakıev (Áýezov aýdany) jáne Vıktor Petrov (Medeý aýdany).
Sonymen qatar, basqa da aýdandardaǵy úzdik aýla sypyrýshylardyń eńbegi de eleýsiz qalmady. Atap aıtqanda, Gýlnara Iýldasheva (Túrksib aýdany), Svetlana Mıhaılova (Medeý aýdany), Gýlsınaı Ishnazarova (Almaly aýdany), Mamed Sarymamedogly (Alataý aýdany), Darhan Muratbekov (Áýezov aýdany), Nıkolaı Samsonov (Bostandyq aýdany), Orazbaı Kashkeev (Jetisý aýdany), Ámirhan Beısanov (Naýryzbaı aýdany) sekildi aýla sypyrýshylar da eskerýsiz qalmady.
Dástúrli jarys 15 maýsymda bastalǵan bolatyn. 15 tamyzǵa deıin sozylǵan baıqaýdyń birinshi kezeńinde turǵyndardyń ózderi daýys berdi. Ekinshi kezeńde «qupııa tekserýshiler» eń kóp daýys jınaǵan 30 aýla sypyrýshynyń jumys aýmaǵyna syrttaı tekserip otyrǵan. «Qupııa tekserýshiler gúlzarlar men jasyl kóshetterdiń jaǵdaıyna, balalar alańy men kólik turaǵyndaǵy tazalyqqa upaı qoıý arqyly óz baǵasyn beredi. Úı turǵyndarynyń pikiri de jeke esepke alynady.
Osylaısha birinshi oryn alǵan Nurıahmet Qýandyqov 200 myń teńge, ekinshi oryndaǵy Álııa Qońyrova 150 myń teńge jáne 3 aýla sypyrýshyǵa taǵaıyndalatyn 3 oryn úshin 100 myń teńgeden berildi. Aýdan boıynsha úzdik dep tanylǵan aýla sypyrýshylar estelik syılyqtarmen jáne dıplomdarmen marapattaldy.
Aınash ESALI, «Egemen Qazaqstan»
Sýretterdi túsirgen avtor
