Jarystar jańǵyryǵy

Fýtzal. Kolýmbııada bastalǵan álem chempıonatynda E irikteý tobyna túsken Qa­zaq­stan quramasy 13 qyr­kúıek kúni ót­ken 1-týrda Argen­tına­ǵa 0:1 esebimen ese berip qoıdy. Oıyn taǵdyryn sheshken jal­ǵyz goldy 20-mınýtta Alamıro Vapo­ra­kı saldy. Endi bizdiń jerlesterimiz 16 qyr­kú­ıek­te Kosta-Rıka, 19 qyr­kúıek­te So­lo­­mon araldary komandalarymen kezdesedi. Shahmat. Bakýde 2 qyrkúıekte bas­talǵan Dúnıejúzilik Olımpıadada osy kezge deıin 10 týrdyń oıyndary oı­nal­dy. Qazir erler quramalary arasynda AQSh, Ýkraına, Reseı, áıelder komandalary arasynda Qytaı, Reseı, Polsha kósh bastap tur. Bizdiń jigitter – 41-shi, qyzdar 27-shi oryndarǵa ornalasty. Sońǵy týrda erlerimiz Mońǵolııany 3:1, qyzdarymyz ıspandyqtardy 2,5:1,5 etip utty. Jekeleı esepte erlerden Murtaz Qajyǵalıev (81-oryn), Azamat О́teǵalıev (83), qyzdardan Sholpan Jylqaıdarova (110), Jansaıa Ábdimálik (135) jáne Gúlmıra Dáýletova (143) úzdikterdiń alǵashqy 150-liginde keledi. Jeńil atletıka. Qazaqstandyq Olga Rypakova Brıýsselde ótken «Brıl­lıant lıgasynyń» qorytyndy kezeńinde úsh qarǵyp sekirýden kúmis medalǵa qol jetkizdi. Ol 14,41 metrlik kórsetkish kórsetti. Altyn medal taǵy da kolýmbııalyq Katerın Ibargýenniń enshisinde ketti. Ol 14,66 metrge sekir­di. Al úshinshi orynǵa 14,16 metrdi baǵyn­dyrǵan grek qyzy Paraskevı Papahrıstý ornalasty. Hokkeı. Astananyń «Barysy» tizgi­nin belorýs mamany Edýard Zanko­­ves ustaǵannan keıingi birinshi matchyn 9 qyrkúıekte óz alańynda Hanty-Mansynyń «Iýgrasyn» 3:2 esebimen jeńdi. Biraq 11 qyrkúıekte Ekaterınbýrgtiń «Avtomobılısin» qabyldap, 3:4 esebimen utylyp qaldy. Kóshpeliler oıyndary. Jarystyń bul túriniń qorytyndy nátıjelerine ózgerister endi. Ony oıynnyń sońǵy kúni márege jetken túrikmen kúresi ákeldi. Komandalyq esepte 27 altyn, 26 kúmis jáne 30 qola medali bar Qyrǵyzstan birinshi orynda qalsa, ekinshi satyǵa 15 altyn, 2 kúmis jáne 6 qola medal alǵan Túrikmenstan kóterildi. Úshinshi oryn 14 altyn, 10 kú­mis jáne 16 qola medaldy Reseı qura­masyna buıyrdy. Qazaqstan komandasy 13 altyn, 15 kúmis jáne 15 qola medalmen tórtinshi orynǵa jyljyp ketti.