Golovkınniń 36-shy jeńisi

Qyrkúıektiń 11-ine qaraǵan túni Londondaǵy O2 arenasynda kásipqoı bokstan qazaqstandyq Gennadıı Golovkın brıtanııalyq Kell Brýkti tehnıkalyq nokaýtpen jeńip, úsh nusqa boıynsha óziniń álem chempıony degen ataǵyn qorǵap qaldy.  Shaıqas Brýktiń jat­tyq­tyrýshysy ortaǵa aq súlgi tas­taýymen toqtady. Osylaısha tehnıkalyq nokaýtpen jeńiske jetken 34 jastaǵy jerlesimiz kásipqoılar rıngindegi 36 urysyn bárin jeńispen bitirdi. Sonyń ishinde 33-shi nokaýtyna qol jetkizdi. Buǵan qosa, qatarynan 23 ret shaıqasyn merziminen buryn aıaqtap otyr. Al 30 jastaǵy Kell Brýktiń 37 shaıqastaǵy eń alǵashqy jeńilisi osy boldy. Ol buǵan deıingi 36 jekpe-jeginiń bárin utyspen bitirip, 25 ret nokaýt jasaǵan edi. Bizdiń jerlesimiz birinshi raýnd­ty qarqyndy bastady. Onyń alǵashqy joıqyn soqqylary qarsylasyn edáýir eseńgiretip jiberdi. Biraq Kell Brýk tez tiktelip ketti. Ekinshi raýndtyń basynda Gennadıı bergen djebti Kell ile-shala qattyraq soqqymen qaıtala­dy. Urystyń osy bóliginde brı­tanııalyq bylǵary qolǵap sheberi basymdaý kórindi. Degen­men, onyń nópirine Golov­kın tótep berdi. Al úshindi raýndta qaıtadan qaharyna mindi. Bul aralyqta onyń qarsylasy sheshýshi soqqylardan áreń sytylyp ketip júrgendeı kórindi. Tórtinshi raýnd qazaqstandyq sportshynyń basymdylyǵy arta túskenin tanytty. Endi bolmasa esesi ketip qalatynyn sezgen Brýk sońynda tarazy basyn ózine aýdarýǵa umtyldy. Sol kezde birer soqqysy jaqsy shyqty. Munyń bári besinshi raýndtyń basynda bosqa ketkendeı boldy. Taǵy da belsendili­gin arttyrǵysy kelgen Kelldi Genanyń aýyr soqqylary kútip turdy. Olardyń joıqyn da qaýipti bolǵany sondaı, Brýktiń sekýndanty ortaǵa súlgi tastaýǵa májbúr boldy. Sońynda brıtanııalyq atlet­tiń ózi jattyqtyrýshysynyń bul áreketine rızashylyq bildirdi. О́zi sodan keıin bir kózine kelgen zaqymǵa baılanysty operasııa ústeline jatqyzyldy. Qazir Gennadııdiń kelesi jekpe-jegi qarasha aıynda ótip qalýy múmkin ekeni jaıly sóz qozǵalyp jatyr.