Qaıtarymy mol qaıyrymdylyq

«Bireý toıyp sekiredi, bireý tońyp sekiredi» demekshi zárý jandarǵa demeýshilik kómek kórsetýdiń ózi qaltalylardyń qas-qabaǵyna qarap qalǵan myna zamanda qaıyrymdylyq aksııalaryn ótkizý az qamtamasyz etilgen áleýmettik salalarǵa qarjy tabýdyń bir kózine aınalyp otyr. Mine, osyndaı qaıyrymdylyq sharasy jaqynda Shýchınsk-Býrabaı shıpajaı aımaǵynda ótkizildi. «CHARITY TOUR DE BURABAY 2016» degen biregeı brendpen ótken tórtinshi qaıyrymdylyq velosherýin qalyptasqan dástúr boıynsha Olımpıada chempıony, Qazaqstan Respýblıkasyna eńbek sińirgen sport sheberi, «ASTANA PRO TEAM» komandasynyń bas menedjeri Aleksandr Vınokýrov bastap shyqty. Qaıyrymdylyq velosherýin Aqmola oblysy ákimdigi, «Rixos Borovoe» qonaq úıi jáne kásipker Bolat О́temuratovtyń «Asyl Mıras» qaıyrymdylyq qory birlesip tórtinshi ret qatarynan uıymdastyryp otyr. Oǵan barlyǵy 500-den asa adam qatysty, onyń ishinde belgili sportshylar, otandyq jáne sheteldik iri kompanııalardyń top-menedjerleri men qyzmetkerleri, túrli memlekettik qury­lym­dardyń basshylary bar. Sport pen qaıy­rymdylyqty úılestirgen bul merekege barlyǵy 1500-den asa adam keldi. Velosherý shıpajaı aýmaǵyndaǵy jalpy uzyndyǵy shamamen 30 shaqyrymǵa sozylǵan tabıǵaty sulý trassa bo­ıymen ótti. «Asyl Mıras» qaıyrymdylyq qorynyń dırektory M.Aıtmaǵambetovtiń aıtýynsha, aldyńǵy jyldary ótkizilgen velosherýlerdiń qorytyndysynda 203 mıllıon teńge qarjy jınalyp, Aqmola jáne Qyzylorda oblys­tarynyń áleýmettik mekemelerine berilgen. Máselen, 2015 jyly ótkizilgen qaıyrymdylyq velo­sherýdiń nátıjesinde Shýche sábıler úıine, Aqmola oblysynyń múgedek balalarǵa arnalǵan ınternatyna, Qyzylorda oblystyq juqpaly aýrýlar aýrýhanasyna jáne Qyzylorda oblysynyń múgedek balalarǵa arnalǵan №2 ońaltý ortalyǵyna 105 mln teńgeden astam jalpy somaǵa kómek kórsetilgen. 2013 jyly uıymdastyrýshylar naýqan aıasynda 11,5 mln teńge jınaı alǵan bolsa, 2014 jyly bul soma 87 mln teńgege deıin jetti. Bıylǵy «Charity Tour de Burabay-2016» velosherýin uıymdastyrýshylar Kókshetaý qalasyndaǵy Aqmola oblystyq balalar aýrýhanasyna arnap qajetti medı­sınalyq jabdyqtar satyp alý úshin 20 mln teńgege qarjy jınaýdy kózdegen bolatyn. Alaıda, naýqan kezinde jınalǵan qarjy kólemi kútkennen asyp túsip, 100 mln teńgeden astam qarjy jınaldy. Endi, jınalǵan qarjy Qyzylorda oblysyn­daǵy eń iri jáne oblys ortalyǵynan shalǵaı jatqan Aral aýdanynyń ortalyq aýrýhanasynda shala týylǵan nárestelerge arnalǵan kólik kıývezin jabdyqtaýǵa jumsalatyn bolady. Osynyń arqasynda jańa týǵan nárestelerdi, ásirese, shala týylǵan sábılerdi syrtqy ortanyń áserinen jaqsy qorǵap, oblystyq perınataldyq ortalyqqa jetkizý kezinde sábıdiń ómirin aman saqtap, ári qaraıǵy damýyna jaǵdaı jasaıtyn qajetti mıkrootany jasaýǵa múmkindik paıda bolmaq. О́z kezeginde Bolat О́temuratovtyń «Asyl Mıras» qaıyrymdylyq qorynyń, Qazaqstan Tennıs federasııasynyń, sondaı-aq, otandyq jáne halyqaralyq belgili kompanııalardyń atynan lottar qoıylǵan qaıy­rymdylyq aýksıony qarjy jınaýǵa eleýli úlesin qosty deýge bolady. Máselen, qazaqstandyq boksshy, orta sal­maqtaǵy Olımpıada chempıony Gennadıı Golovkınniń qolǵaby eń tanymal lottardyń birine aınalyp, ol úshin birneshe adam talasty. Nátıjesinde, Qazaqstan maqtanyshynyń qolǵaby aýksıon kezinde 8 mln teńgege satyldy. «ASTANA PRO TEAM» komandasy birden úsh lotty, atap aıtqanda, Fabıo Arý jattyqqan olımpıadalyq velosıpedti, Ispanııadaǵy «Výelta-2016» velojary­synyń aqtyq kezeńine barýǵa arnalǵan 3 kúndik sapardy jáne Vınchenso Nıbalıdiń Djıro d’Italııa jarysynda jeńiske jetken kezde kıgen djersıin bássaýdaǵa usyndy. Vınchenso Nıbalıdiń jeńisti kıimi 1 mln 450 myń teńgege satylǵan bolsa, qaıyrymdylyq aýksıonnyń qatysýshylary 200 metrlik qashyqtyqqa brass tásilimen júzý boıynsha 2016 jyldyń Olımpıada chempıony atanǵan Dmıtrıı Balandınniń qoltańbasy qoıylǵan fýtbolka da týra osyndaı baǵaǵa baǵalandy. Múmkindigi shekteýli balalar salǵan sýretter aýk­sıondaǵy lottardyń ishinde eń joǵary baǵaǵa satylyp, úsh sýret úshin 11 mln teńge usynyldy. Aýksıon qorytyndysy boıynsha barlyǵy 49 mln 850 myń teńge jınalyp, Qaıyrymdylyq jármeńkesi kezindegi saýdadan túsken qarjyny, korporatıvtik jáne jekelegen tulǵalardyń jarnalaryn qosqanda, bul soma 100 mln teńgege deıin jetti. Jınalǵan búkil qarjy qaıyrymdylyq maqsatta jumsalatyn bolady. Qaıyrymdylyq sharasyna ataqty sportshylar, atap aıtqanda, Rıodaǵy Olımpıada jeńimpazdary men júldegerleri Danııar Eleýsinov (boks), Vasılıı Levıt (boks), Gıýzel Manıýrova (áıelder kúresi) qatysty.  Ulan SANJAR