Dástúrli baıqaý máresine jetti

Otbasy – bereke-birligi, tálim-tárbıesi qalyptasqan qaǵıdasymen, asyl qasıetteri arqyly ózgelerge ónege bolar shaǵyn memleket. Adamzat balasynyń tárbıe alyp, tirshilikpen tanysar alǵashqy bastaý bulaǵy ol óziniń otbasy ekeni aıdan anyq. Otanymyzdyń órkendep damýyna óziniń úlesin qosatyn birden-bir kúsh desek bolady. «Otan otbasynan bastalatynyn» eskersek, aldymen Otandy quraıtyn otbasy myqty bolýy shart. Ol úshin otbasylyq qundylyqtardy memlekettik deńgeıde jandandyrý, úlgili otbasylardy nasıhattaý jumystary jolǵa qoıylýy qajet. Osy maqsatta, 2013 jyldan bas­tap Elbasy Nursultan Ábishuly Nazarbaevtyń Jarlyǵymen qyrkúıek aıynyń ekinshi jeksenbisi «Otbasy kúni» bolyp jarııalanyp, kelesi jyly «Mereıli otbasy» ulttyq baıqaýynyń tusaýy kesildi. Baıqaýǵa alǵashqy jyly 1298 otbasy qatyssa, ótken jyly bul kórsetkish 2285-ke ósti. Al bıyl 2501 otbasynan usynys túsipti. Olardyń qatarynda jetim-jesirge qorǵan bola bilgen qaıyrymdy jandar men kópbalaly otbasylar, bir shańyraq astynda birligi jarasqan kópulttylar men ata-dástúrdi jalǵastyrǵan túrli dınastııa ókilderi bar. Bul baıqaýdyń alǵashqy jeńimpazdary – Bımahambetovter otbasy. Eltaı Bımahambetuly men onyń zaıyby 8 bala, 33 nemere, 10 shóbere tárbıelep ósirgen. Balalaryna joǵary bilim berip, mádenıet salasynyń damýyna úlken úles qosty. Ońtústik Qazaqstan oblysynyń mereıin asyrǵan Bımahambetovter 2014 jyly Prezıdent Nursultan Nazarbaevtyń qolynan arnaıy dıplom men qazaqstandyq shaǵyn avtobýstyń kiltin aldy. Dástúrge aınalǵan bul shara ótken jyly da jalǵasyn taýyp, mańǵystaýlyq Qulsarıevter otbasy jeńimpaz atandy. Áýlettiń basshysy Oryn Qulsarıev uzaq jyldar boıy ustazdyq etip, qazaq óneriniń damýyna eleýli úles qosqan dombyrashy. Jubaıy ekeýi 12 baladan, 43 nemere, 41 shóbere súıip otyrǵan baqytty jandar. Ulttyq baıqaýda úzdik dep tanylǵan otbasy «Mereıli otbasy» ulttyq baıqaýynyń arnaıy dıplomymen Qazaqstanda shyǵarylǵan shaǵyn avtobýstyń kiltin aldy. Bıyl da úshinshi márte uıymdastyrylyp otyrǵan ulttyq baıqaýdyń aqtyq saıysyna Astana men Almaty qalalaryn qosqanda 16 aımaqtyń jeńimpazdary jıylyp otyr. Olardyń barlyǵy da «Mereıli otbasy» degen atqa laıyq. Alaıda, baıqaýdyń sharty boıynsha talǵam men talap bir ǵana jeńimpazdy tańdaıdy. Jeńimpazdardy irikteýge sms habarlamalar jáne ınternet-resýrs arqyly, ınteraktıvti daýys berý jolymen eldiń barlyq turǵyndary belsendi túrde qatysty. Bıylǵy jeńimpazdardy marapattaý rásimine Memlekettik hatshy Gúlshara Ábdiqalyqova qatysyp, Elbasynyń quttyqtaý hatyn oqyp berdi. «Árbir otbasy bizdiń basty maqsatymyz – Bolashaǵy birtutas Máńgilik El bolý jolynda memleketimizdi nyǵaıta túsýge baǵa jetpes úles qosady. Otbasylyq qundylyqtary bekem ornyqqan el ǵana myzǵymas memleket bola alady. Búgingi mereıli kúnde shańyraǵynda izgi qarym-qatynas, ıgi dástúrler saqtalyp, ózara syılastyq saltanat qurǵan barlyq otbasyna rızashylyǵymdy bildiremin», – delingen quttyqtaýda. Saltanatty is-shara aıasynda Mem­lekettik hatshy márege jetken ár otbasyna gramota men dıplom jáne turmystyq tehnıka satyp alýǵa arnalǵan 300 myń teńgelik sertıfıkat tapsyrdy. Qyrkúıektiń 2-si men 9-y aralyǵyn­da ınternet arqyly sms daýys berý boıyn­sha ótkizilgen konkýrstyń fınal­dyq týrynda jeńimpaz otbasy anyq­tal­dy. Aqtóbe oblysynan qatysqan Nusqabaevtar otbasy «Mereıli otbasy» ulttyq baıqaýynyń 2016 jylǵy laýreaty atandy. Otaǵasy – Uly Otan soǵysynyń ardageri, ol 46 jyl boıy aýyl mektebinde ustazdyq etken. Erli-zaıypty Nusqabaevtardyń shańyraq kótergenine 72 jyl tolyp, 10 bala, 31 nemere, 22 shóbere súıip otyr. Balalary men nemereleri el ekonomıkasynyń túrli salasynda tabysty eńbek etip júr. Ulttyq baıqaýdyń jeńimpazy bolǵan otbasyna Memlekettik hatshy estelik syılyq pen shaǵyn avtobýstyń kiltin saltanatty túrde tabys etti. – «Eldiń tynyshtyǵy men tatý­lyǵyna erekshe mán berip, otbasylyq qun­dylyqtardyń quldyramaýyn qadaǵalap, osyndaı urpaqqa qajetti ulttyq baı­qaý­lardyń ótýine bas-kóz bolyp, bizge qurmet kórsetip jatqan Elbasyna eń birin­shi alǵysymdy aıtamyn. Bala­larym­­nyń ishinde, nemerelerimniń ishin­de joǵary oqý ornyn bitirip, túrli qyz­met atqaryp júrgenderi jeterlik. Onyń bar­lyǵy táýelsizdigimizdiń arqasy desem, artyq aıtqandyq bolmas. Elimiz qazir Táýelsizdigimizdiń 25 jyldyǵyn toı­laý­dy bastap ketti. Bul kirpik qaq­qan­­daı ýaqyt. Osy jyldar ishinde Qazaq­­stan­dy dúnıe júzi tanyp-bildi. Otan­nyń myqty, myǵym bolýynda otba­sy­nyń orny aıryqsha. Sondyqtan árbir adam osy jaýapkershilikke adal­dyq­­pen qara­ǵan­dary abzal», dedi jeńim­paz ot­basy­nyń aqsaqaly Abdýlla Nusqabaev. Halqymyz ákeni asqar taýǵa bala­ǵan, «Jumaq – ananyń tabanynyń astynda» dep sanaǵan, «Bala – baýyr etiń», dep urpaǵyna aıryqsha qamqor­lyqpen qaraǵan. Atalǵan baıqaý osy sal­tymyz­ǵa salǵyrt qaramaýǵa jeteleıdi. Son­dyq­tan da úzdik shyqqan úlgili otbasylar­dy nasıhattaýǵa atsalysyp kele jatqan jobanyń jelisi úzilmesin dep tileımiz. Marapattaý rásimi Qazaqstannyń estrada ártisteriniń qatysýymen merekelik konsertke ulasty. Raýan QAIDAR, «Egemen Qazaqstan» ASTANA Sýretti túsirgen Erlan OMAROV, «Egemen Qazaqstan»