О́mir degen kınodaǵy kez kelgen keıipkerdiń orny men oınaıtyn róli bolatyny belgili. Biraq keıde eki adamnyń beınesin bir adam somdap júrgenin kórgende, eriksiz tańǵalasyń. Pendesiniń peshenesine qanshama qabiletti qalaı syıǵyzǵan dep Jaratqannyń qudyretine taǵy bir bas ıesiń.
Onyń negizgi mamandyǵy – jýrnalıst. Almatyda dúnıege kelip, AQSh-ta bilim aldy. Ár jyldary radıoda, komedııalyq shoýlarda tilshi, redaktor bolyp qyzmet atqardy. Birneshe ret «Emmı» syılyǵynyń laýreaty atandy. AQSh-taǵy RegLight galereıasynda sýretshi bolyp qyzmet etti. Ol kim deısiz ǵoı? Ol ónerli otbasynyń bir múshesi – Elena Tarakova. О́tken aptada Astanadaǵy Reseı Ǵylym jáne mádenıet ortalyǵynda Elenanyń eńbegin tanystyryp, shyǵarmashylyǵynan syr shertetin sýret kórmesi ashyldy. Qazaqstanda tuńǵysh ret uıymdastyrylǵan kórmege mýltıplıkasııalyq ctılde salynǵan 39 kartına qoıylǵan. Ekspozısııany tamashalaýǵa kelgenderdiń arasynda qylqalam sheberiniń atasy men ákesi, elimizge tanymal sýretshiler men jýrnalıster jáne kórme ıesiniń dostary boldy.
– Men shyǵarmashylyqqa jaqyn adamdardyń otbasynda óskendikten, sezimge tez boı aldyrǵysh, qııalǵa berilgish bolyp qalyptastym. Ár týyndym meniń bir-bir perzentim sekildi. Olardy janymmen jaqsy kórip, júregimmen berilip salamyn. Salatyn dúnıemniń tarıhymen jete tanysyp, oılanyp, tolǵanyp, qyr-syryna qanyq bolǵanda ǵana ony oryndaýǵa kirisemin. Bir sýretti salýǵa ketetin ýaqyt týyndynyń kólemine jáne kúrdeliligine baılanysty bolady. Tapsyryspen sýret salatynymdy jasyrmaımyn. Alaıda, meniń tapsyrys berýshige qoıatyn bir talabym bar: maǵan eshqandaı shekteý qoıylmaýy kerek. Sýretterimniń sıýjetin oıdan emes, ómirden alamyn, – dedi ol.
Elena eń birinshi shyǵarmashylyq erkindikke erekshe mán beretinin aıtty. Oǵan sebep, alǵashqyda ol sýretterin qatyp qalǵan qaǵıdamen, talap-tártippen salýǵa tyrysqan. Biraq shyǵarmashylyq týyndylar shynjyrǵa baılap, tártipke baǵyndyrýǵa kónbeıtin kóńildiń qalaýy men júrektiń alaýynan týyndaıtyn sıqyrly syılyq sııaqty.
– Maǵan aldymdaǵy sýretshilerdiń sózderi qatty áser etti. Olar sýretti belgili sheńbermen, shekteýmen salsam, ózgelerden esh aıyrmashylyǵym bolmaıtynyn túsindirdi. Al men eshkimge uqsamaıtyn ózindik qoltańbamdy qalyptastyrǵym keldi. Áý basta sýretti qyzyǵýshylyqpen, qazir qushtarlyqpen salamyn. Men úshin búgingi ekspozısııadaǵy sýretterdiń barlyǵy qymbat, barlyǵy qundy. Kórmede «Pil» degen kartına tur. Ony men anama arnap saldym. Bul kartınany eshkimge, eshqashan, eshqandaı aqshaǵa satpaımyn, – dedi sýretshi-jýrnalıst.
Qalam men qyl qalamdy serik etken sulýdyń buǵan deıingi kórmesi AQSh-ta ótken. Mahabbaty men mashaqaty qatar júretin qos óner salasynyń da salmaǵy aýyr. Bireýinde oılanyp jazasyń, ekinshisinde tolǵanyp salasyń. Túptep kelgende, ekeýi de tarıh, ekeýi de tárbıe, ekeýi de estelikke aınalatyny aıqyn.
Atalmysh kórme Astanadaǵy Reseı Ǵylym jáne mádenıet ortalyǵynda qyrkúıektiń 23-ne deıin jalǵasady.
Raýan QAIDAR,
«Egemen Qazaqstan»
