Ertisten esken ásem áýen

О́skemendikter osy kúni óz­derin sonaý Eýropa tórindegi bek­zat ónerdiń ordasy Rımde, Mılanda júrgendeı sezinetinderi bar. Álemde klassıkalyq mýzy­kanyń jóni bólek. Tyńdarmany basqa, talǵamy basqa. Jurttyń mádenıeti kórinedi. Osy údeden tabylý maqsatynda óńir basshysy Danıal Ahmetovtiń bastamasymen ótken jyly qolǵa alynǵan «Aq Ertis» klassıkalyq mýzyka festıvali bıyl ekinshi márte ótti. Shahar shyrqaǵan ásem ándermen de shyraıly. Baý-ba­ǵyn­da bulbul quıqyljyǵan ertedegi shyǵys shaharlary sııaqty. Qala kúni qarsańynda uıymdastyrylǵan bul shara merekelik kóńil-kúıdi ústep, baǵdarlamany baıyta túskendeı boldy. Zer salsaq, bul Ertistiń jaǵa­synda kimder án salmady?! Án atasy Ámire men Áset ásemsal kúıge bólegen aq Ertis, erke Ertis qoı! Ánniń tabıǵaty uly ózenniń ózi sııaqty. Tynyp, tereńinen aǵa­tyn tusy bar. Syldyrlap, syl­qyldap kúledi. Kómeıdi tolty­ryp shyǵatyn ún sııaqty arnasymen aqyryn lyqsıdy. Jel tur­ǵanda terbele me, sıqyrly saz da kóńildi terbetpeı me?! Tolqyndary tolqı ma, án de shal­qymaı ma?! Kúrkirep aǵatyn kezderi de bolady ǵoı, ánniń de shyrqaý shegi ishekti úzildire jazdaıdy. Mine, ózenniń ózi jeti nota ispetti. II halyqaralyq «Aq Ertis» klassıkalyq mýzyka festıvaliniń tabıǵaty osyndaı. Festıvalǵa elimizdiń jáne shet elderdiń belgili óner sheberleri qatysty. Shyǵys Qazaqstan oblystyq dra­ma teatryna jınalǵan óner­súıer qaýym Memlekettik syı­lyqtyń laýreaty, tanymal opera ánshisi Shahımardan Ábilov, Qazaqstannyń halyq ártisi, Qazaq ulttyq óner ýnıversıtetiniń rektory Aıman Musaqojaeva, «Astana Opera» teatrynyń so­lısi Súndet Baıǵojın, qazaq ope­ra­synyń maqtanyshyna aınal­ǵan Dına Hamzına sekildi otandastarymyzben birge, más­keýlik Fraýchı atyndaǵy gıta­ra kvartetiniń, amerıkalyq djaz ánshisi Tvana Rods pen «Ev­­ro­­vıdenıe» jáne halyqaralyq baıqaýlardyń jeńimpazy Dmı­trıı Ishhanovtyń, sondaı-aq Túr­kııadaǵy Samsýn memlekettik opera jáne balet teatrynyń dı­rıjeri Mıhaıl Kırhgoff sekildi alystan at arytyp kelgen mýzyka maıtalmandarynyń ónerin tamashalady. О́skemen qalasynyń tól merekesine oraı­lastyrylǵan aıtýly sharaǵa oblys ákiminiń orynbasary Jaq­sy­lyq Omar qatysty. Festıval eki saǵatqa sozyldy. Bul eki saǵat tyńdarmandardy bıik te mártebeli ónerdiń tuny­ǵyna boılatty. Qulaq quryshyn qan­dyrǵan konsert mýzyka tili­men ómirdiń ózin órgendeı edi. Sezim pernesin shertken ándermen sýsyndaǵan óńir turǵyndary rýhanı turǵydan túlep, ósip qaıtty. Ásirese, talantty ánshi, «As­tana Opera» teatrynyń solısi, halyqaralyq baıqaýlardyń laý­reaty Súndet Baı­ǵo­jınniń «Sevıl shashtarazy» operasynan shyrqaǵan arııasy, shyǵys­qa­zaqstandyq opera ánshisi Aıjan Mazkenovanyń oryndaýynda­ǵy Latıf Hamıdıdiń «Qazaq val­si» men «Astana Opera» mem­lekettik opera jáne balet teatrynyń solısi Dına Ham­zı­na­nyń oryn­daýyndaǵy Rodıon Shedrınniń «Tek mahabbat emes» operasyndaǵy Var­varanyń ánderi men aıtys­tary sátti shyǵyp, ónersúıer qaýym­nyń júregine jetti. Sahnaǵa Memlekettik syı­lyqtyń laý­reaty Shahımardan Ábilev shyǵyp Ahmet Jubanov pen Latıf Hamıdıdiń «Abaı» operasynan arııa aıtqanda kórer­menniń erekshe qoshemeti birazǵa deıin basylmady. Sonymen qatar, bel­­gi­li opera ánshisi Aleksandr Zasepınniń «Nado mnoı nebo sınee» týyndysyn da naqyshyna keltire oryndady. Ásem ánmen shalyqtaǵan kó­ńil-kúı Táýelsizdiktiń 25 jylyndaǵy tolassyz eńbektiń baıyrqalaǵan sáti sııaqty. Osy shırek ǵasyrda Memleket basshysy Nursultan Nazarbaevtyń óner men mádenıetke zor kóńil bólgeniniń aıǵaǵy – osy mártebeli óner keshiniń záýlim de zamanaýı óner ordasynda, óńirdegi jańadan salynǵan teatr ǵımaratynda ótkizilýi deýge bolady. Atalǵan ǵımarattyń mate­rıaldyq-tehnı­kalyq bazasy jyldan jylǵa nyǵaıyp keledi. Saltanatty kesh barysynda jınal­ǵan qaýym oblys basshysy Danıal Ahmetov­tiń qoldaýymen qol jetkizgen álemge tanymal «Steinway» markaly jańa roıaldiń tusaýkeserine kýá boldy. Endi shyǵysqazaqstandyqtardyń álemdik deńgeıdegi pıanısterdi shaqyryp, ónerin tamashalaýǵa múmkindigi bar. – Bul festıval jyldan jylǵa qanatyn keńge jaıyp keledi. Búginde festıvalǵa Reseı, Germanııa, Túrkııa sekil­di álem elderinen ánshiler kóptep qatysýda, – dedi fes­tıval sońynda áıgili skrıpkashy Aıman Musaqojaeva. Mýzyka maıtalmandary shyǵys­qazaqstandyqtardyń óner dese ishken asyn jerge qoıatyn ys­tyq yqylasy men joǵary talǵamyna rızashylyqtaryn jetkizdi. Dýman ANASh, «Egemen Qazaqstan» О́SKEMEN