Nazarbaev pen Pýtın tarıhı fılmdi tamashalady

Qazaqstan Prezıdenti «Jıyrma segiz panfılovshy» kınofılminiń kórsetilimin tamashalady, dep habarlady Qazaqstan Prezıdentiniń baspasóz qyzmeti. Reseı Prezıdentiniń Qazaqstanǵa jumys sapary Nursultan Nazarbaev pen Vladımır Pýtınniń «Jıyrma segiz panfılovshy» fılmin birge kórýimen aıaqtaldy. Kınotýyndy A.Bektiń «Volo­ko­lamsk tas joly» shyǵarmasy negizinde túsirilgen. Onyń oqıǵalary Panfılov dıvızııasy atqyshtar batalonynyń komandıri Baýyrjan Momyshulynyń atynan áńgimelenedi. Memleketter basshylary Al­matyda qurylǵan, jaý tankileriniń Máskeýge baratyn jolyn bógegen dıvı­zııanyń erligi keler urpaq esinde árdaıym qalýǵa tıis ekenin atap ótti. Reseıdiń mádenıet mınıstri V.Medınskıı eki el basshylaryna qazaq, orys, qyrǵyz jáne ýkraın jaýyn­­gerlerinen quralǵan dıvızııa­nyń batyrlyǵy men qaharmandyǵy týraly áńgimeledi. – Erlik kórsetken dıvızııanyń ereksheligi onyń quramynda ekendi­gin atap aıtý kerek. Ol kadrlyq ás­kerılerden emes, áskerge shaqy­rylǵan qarapaıym azamattardan jasaqtaldy, olar soǵan deıin búkil Eýropany basyp ótken kásibı tank quramalaryn toqtata aldy, – dedi V.Medınskıı. Fılmdegi oqıǵa 1941 jyldyń kúzinde bolǵan. Jazbasha derek boıynsha 1941 jyldyń 16 qarashasynda general I.V.Panfılov qolbasshylyq etken 316-shy atqyshtar dıvızııasynyń 28 sarbazy Dýbosekovo razezin qorǵap, Máskeýge bet alǵan nemistiń tank batalonyn toqtatady. Sıýjet tolyǵymen keńes sarbazdarynyń erligine arnalǵan. Qysqy kórinister Sankt-Peterbýrg pen Ivanovo tóńireginde túsirilgen. Sońǵy kadrlarda Almatydaǵy 28 gvardııashy-panfılovshylar atyndaǵy saıabaq kórsetiledi.