О́tken jyly QazaqGaz Aimaq mobıldi qosymshany iske qosty. Qosymsha gaz tutynýshylarǵa eseptegish kórsetkishterin qashyqtan ári yńǵaıly jolmen joldaýǵa múmkindik beredi. Onyń basty ereksheligi – kórsetkishterdi foto arqyly avtomatty túrde taný, derekterdegi qate men aýytqýlardy aldyn ala tekserý. Sondaı-aq paıdalanýshylar tutyný kólemi men tólemder tarıhyn kóre alady, eseptegishti tekserý merzimi men josparly jumystar jóninde habarlama alady.
Sıfrlandyrý jáne jasandy ıntellekt jyly qandaı jobalar júzege asady?
Qazirgi tańda qosymshada vırtýaldy AI-keńesshi jabyq testileý kezeńinen ótip jatyr. Jasandy ıntellektke negizdelgen bul sıfrlyq kómekshi tabıǵı gaz tutynýshylardyń suraqtaryna táýlik boıy jaýap berýge baǵyttalǵan. Kompanııanyń koll-ortalyǵy ázirge tek jumys ýaqytynda qyzmet kórsetse, turmystyq gazǵa qatysty saýaldar kez kelgen mezette, demalys pen mereke kúnderi de týyndaıtyny belgili. Osy olqylyqtyń ornyn AI-keńesshi toltyrmaq.
Jańa servıs birneshe LLM-modelde synaqtan ótkizilip, eń tıimdi ári dál nusqasy tańdalyp jatyr. Aqparattyń sapasy men ózektiligine aıryqsha mán berilgen. Vırtýaldy kómekshi tarıfter, salalyq normatıvtik-quqyqtyq talaptar men erejeler, qajetti qujattar tizimi, gazǵa qosylý tártibi jáne ózge de suraqtar boıynsha tolyq ári jańartylǵan málimet usynady. Bul tutynýshylarǵa qajetti keńesti jedel ári qolaıly túrde alýǵa jol ashady.
AI-keńesshiniń fýnksıonaly gazben jabdyqtaý taqyrybymen shekteledi. Onyń bilim bazasy turaqty túrde jańartylyp, servıs aldaǵy ýaqytta da jetildirile bermek.
Búginde mobıldi qosymshany jarty mıllıonnan astam adam júktegen. Sonyń kómegimen 200 myńnan asa gaz eseptegish kórsetkishi joldanǵan. Bul sıfrlandyrýdyń gaz salasyndaǵy naqty nátıjesin kórsetetin mańyzdy kórsetkishterdiń biri sanalady.
