Oblystyq polısııa departamentiniń málimetinshe, 3 sáýir kúni saǵat 22:00 shamasynda Maqat aýdanynda tártip saqshylary quqyqqa qarsy áreketti toqtatqan.
«Oqıǵa barysynda bir top azamat agressııa tanytyp, polısııa qyzmetkerlerine fızıkalyq kúsh qoldanǵan. Sonyń saldarynan eki qyzmetker zardap shekti», dep habarlady vedomstvonyń baspasóz qyzmeti.
Oqıǵaǵa qatysqan barlyq tulǵalar anyqtalyp, olarǵa qatysty prosessýaldyq sharalar qabyldandy. Bılik ókilderine kúsh qoldaný faktisi boıynsha Qylmystyq kodekstiń tıisti baby boıynsha is tirkelip, sotqa deıingi tergeý júrgizilip jatyr.
Polısııada atap ótkendeı, quqyq qorǵaý organdary qyzmetkerlerine qarsy kez kelgen zańsyz áreket zańdy óreskel buzý bolyp sanalady jáne zańnamaǵa sáıkes jaýapkershilikke ákeledi.
Tergeý múddesine baılanysty ózge aqparat jarııa etilmeıdi.
