Onjyldyqtyń eń aýqymdy jobasyn ótken ǵasyrdaǵy tarıhı bastamalardyń biri – Túrkistan-Sibir temirjolymen salystyrsaq, LRT-ny Túrksibtiń zańdy jalǵasy desek te bolady. HH ǵasyrda Túrksib Qazaqstan ekonomıkasy men kólik salasynyń damýyna serpin bergen strategııalyq joba boldy. Ol aımaqtardy baılanystyryp, jańa óndiris pen saýda baǵyttarynyń qalyptasýyna jol ashty. Búgingi LRT de elordanyń jańa kólik júıesin qalyptastyryp, qalalyq mobıldilikti jańa deńgeıge kóterýdi maqsat etedi.
Búgin astanalyq turǵyndar biregeı jańa kólik túriniń alǵashqy jolaýshylary atandy. Joba aıasynda jolaýshylardyń jaılylyǵyna erekshe nazar aýdarylǵan. Stansııalarda eskalatorlar, lıftiler, avtomattandyrylǵan bılet júıeleri men kútý zaldary qarastyrylǵan. Sonymen qatar, múmkindigi shekteýli azamattarǵa arnalǵan barlyq qajetti jaǵdaı jasalǵan.
Mamandardyń pikirinshe, LRT jelisindegi reıster oıdaǵydaı ótip jatyr.
«Jobanyń elorda damýy úshin strategııalyq mańyzy zor. Alǵashqy reıster jospardaǵydaı ótip jatyr. LRT Astananyń jańa kelbetiniń bir bóligine aınalady. Qalanyń halyqaralyq ımıdji jaqsaryp, ınvestısııalyq jáne týrıstik tartymdylyǵy artady», deıdi «Ýnıversıtet» stansasynyń basshysy Rústem Quttybaıuly.
Stansa basshysynyń aıtýynsha, qaýipsizdik máselesi de nazardan tys qalmaǵan. Júıe halyqaralyq standarttarǵa sáıkes keletin SIL 4 deńgeıindegi qaýipsizdikpen jabdyqtalǵan. Beınebaqylaý, turaqty monıtorıng, kúzet jáne tótenshe jaǵdaılarǵa áreket etý júıeleri engizilgen. Munda pılotsyz basqarý elementteri, sıfrlyq dıspetcherleý, PSD qaýipsizdik esikteri men avtomattandyrylǵan júıeler jumys isteıdi.
Aıta keteıik, LRT jobasyn iske asyrýǵa halyqaralyq seriktester men tehnıkalyq keńesshiler qatysqan. Qazirgi tańda júıeniń jumysyn qamtamasyz etý úshin shamamen myńǵa jýyq maman tartylǵan.
Tarıhı oqıǵanyń kýási bolǵan elorda turǵyndarynyń da qýanyshynda shek joq.
«Stansııalar óte yńǵaıly jasalǵan. Barlyǵy avtomattandyrylǵan. Bul Astananyń damyp kele jatqanyn kórsetedi», deıdi astanalyq turǵyn Arýaı Qulmyrzaeva.
El tarıhyndaǵy eleýli oqıǵanyń kýási bolý úshin ózge qalalardan kelgender de bar. Solardyń biri almatylyq zeınetker Sholpan Andabekova óziniń alǵashqy jolaýshylardyń biri bolǵandyǵyna qýanyshty ekendigin jetkizdi.
«Búgin kópten kútken LRT-nyń alǵashqy jolaýshysy atanyp otyrmyz. Lıft pen eskalatorlardyń bolǵany jaqsy. Qoǵamdyq kólikte mundaı qolaılylyq óte mańyzdy», deıdi ol.
Osylaısha, bir ǵasyr burynǵy Túrksib Qazaqstandy jańa damý kezeńine jetelese, búgingi LRT Astananyń zamanaýı ári tehnologııalyq megapolıs retinde qalyptasýyna jol ashatyn jańa kólik dáýiriniń bastaýy bolmaq.
Aldaǵy ýaqytta LRT jelisin keńeıtý josparlanǵan. Kosshy baǵyty boıynsha ekinshi kezeńniń qurylysy bastalyp, jańa jeliler salý jumystary qolǵa alynǵan. Sonymen qatar eski vokzal baǵytyn baılanystyratyn jańa tarmaq jobalanyp jatyr.
