Qyzylorda qalasyndaǵy Syrdarııa ózeniniń sol jaǵalaýy – keıingi jyldary erekshe qarqynmen damyǵan aýmaq. Munda áleýmettik nysandar men turǵyn úı sany jyl ótken saıyn artyp keledi. Osy aýmaqta zamanaýı ýrbanıstıkalyq sheshimder negizinde jaıly ári qolaıly ınfraqurylym qalyptasyp úlgerdi.
Búginde sol jaǵalaýda 169 nysan bar, 136 kópqabatty turǵyn úı paıdalanýǵa berilip, myńdaǵan otbasy baspanaly boldy. Halyqqa qolaıly orta qalyptastyrý maqsatynda 20 áleýmettik jáne 13 bıznes nysany jumys isteıdi.
Qazirgi ýaqytta munda 47 qurylys salynyp jatyr. Onyń 25-i –kópqabatty turǵyn úı, 20-sy – kásipkerlik nysan, bir aýrýhana jáne bir emhana bar. Turǵyndardyń qaýipsiz jol qozǵalysyn uıymdastyrý maqsatynda Isa Toqtybaev kóshesinen sol jaǵalaýǵa ótetin tórt jolaqty jańa avtomobıl kópirin salý josparlanǵan.
Jańa shaǵyn aýdan turǵyndarynyń sany 25 myńnan asty, mektep, balabaqsha, saýda oryndary halyq suranysyna saı qyzmet kórsetedi. Qoǵamdyq kólik úzdiksiz qatynaıdy. Búgin kilti tapsyrylǵan jańa úılerdiń turǵyndary da sol jaǵalaýlyqtar qataryn tolyqtyrdy.
Saltanatty rásimde sóz sóılegen óńir basshysy keıingi jyldardaǵy halyqtyń turmys sapasyn arttyrýǵa baǵyttalǵan aýqymdy jobalardy atap ótti.
«Memleket basshysy Qasym-Jomart Kemeluly «Qoljetimdi baspana – arman emes, bizdiń azamattarymyzdyń aldyndaǵy mindetimiz» degen bolatyn. Búgin turǵyn úı kezeginde turǵan jerlesterimizge jalpy aýmaǵy 33 myń sharshy metrden asatyn 600 páterdiń kiltin tabystap otyrmyz. Turǵyn úı kesheniniń aýmaǵynda eki fýtbol, tórt sport jáne oıyn alańy, tynyǵý aımaǵy, 250 oryndyq avtoturaq jáne úsh kommersııalyq nysan ornalasqan. Aldaǵy ýaqytta da shahar kelbetine sán beretin zamanaýı turǵyn úıler boı kóteredi.
Menshikti baspana – turaqtylyq pen erteńgi kúnge degen senimniń kepili. Jańa qonystaryńyz qutty bolsyn! Ár shańyraqqa baq-bereke, yrys pen yntymaq tileımin», dedi Murat Ergeshbaev.
Oblys ákimi bul jobalardyń aımaqtaǵy qurylys salasynyń áleýetine, qurylysshylardyń kásibı deńgeıine oń yqpal etkenin jetkizdi.
Qyzylordadaǵy turǵyn úı qurylysynyń qarqynyn óńirdiń áleýmettik-ekonomıkalyq damý kórsetkishterinen de, aı saıynǵy osyndaı rásimder men qonystoılardan da baıqaýǵa bolady. Bul turǵyndardy baspanamen qamtý jumystarynyń bir júıege túskenin kórsetedi. Bıyldyń ózinde turǵyn úı kezegindegi azamattarǵa 2400 páter tabystaý úshin bıýdjetten 55 mlrd teńgeden astam qarjy qarastyrylǵan.
Jıynda Parlament Májilisiniń depýtaty Marhabat Jaıymbetuly sóz sóılep, el aǵasy Imamadın Zákiruly batasyn berdi. Turǵyn úıdi sapaly etip salǵan qurylysshylar oblys ákiminiń Alǵys hatymen marapattaldy.
