Foto: e-history.kz
Syrǵalardyń eki túri bar. Erkek laqtarǵa rettik nómiri bar qarapaıym syrǵa taǵylsa, urǵashylaryna elektrondyq, GPS arqyly baqylaýǵa bolatyn syrǵa taǵylady. Syrǵanyń ereksheligi kún sáýlesimen qýattalyp, úsh jylǵa deıin jumys isteıdi.
Ǵalymdar salmaǵy 32 gramm bolatyn syrǵanyń quralaıǵa zııany joq deıdi. Zamanaýı qurylǵy arqyly kıikterdiń júrgen jolyn baqylap, ortasha jasyn anyqtaıdy. Kúnine 4 ret belgi beretin chıp arqyly aqbóken úıirin onlaın rejimde kórýge bolady.
«Úsh kún buryn syrǵa salǵan quralaı búginge deıin 7 shaqyrym jerge uzap úlgergenin kórdik. Kıik tólderi saǵat sanap ósip, kún ótken saıyn belsendi bola túsedi. Qazir qustaı ushqan eresek kıikterge ilese alady», deıdi Batys óńirlik «Tabıǵı orta» ekologııalyq ÚEU birlestiginiń dırektory Aıbat Muzbaı.
Zoologııa ınstıtýty mamandary Muǵaljar, Baıǵanın men Shalqar aýdandarynyń shekarasy toǵysqan tusqa arnaıy keldi. Sebebi bul aýdandar Ústirt kıiginiń keń taraǵan jeri. Ien dalada erkin kósiletin aqbókender tóldeýge osy mańǵa jınalady.
Atyraý oblysynyń úsh turǵyny Aqtóbede kıik ushasymen ustaldy
«Jalpy Ústirt kıigi Aqtóbe oblysy jáne Mańǵystaý oblysynyń jerlerinde mekendeıdi. Keıbir ýaqyttarda Ústirt kıigi kórshiles elderge, ıaǵnı О́zbekstan eline ótken ýaqyty bolǵan. Qazirgi tańda ondaı jaǵdaı baıqalmaıdy. Sebebi osy jerler qazirgi tańda kıikterge qolaıly bolyp tur. Jalpy qazirgi tańda osy Ústirt kıiginiń massasy osy jerde deýge bolady. Shamamen esepteýimiz boıynsha 60-70 paıyzy tóldep boldy», dedi «Ohotzooprom» RMQK mekemesiniń aǵa ınspektory Shoqan Aqylbekov.
Mamandardyń sońǵy sanaǵy Ústirtte 78 myńnan astam kıik bar ekenin anyqtady. Quralaıy qosylǵan soń, saıyn dala erkesiniń úıiri birshama ósedi. Odan bólek Oral men Batpaqdala aqbókenderi de jyldyń mamyrajaı mezgilinde Aqtóbe óńirine bet burady.
