Aldaǵy sońǵy aralyq saılaýlar taıaǵan saıyn Tramp óz jolyn jalǵaı alatyn tulǵalardy tarazylap júr. Onyń paıymynsha, bul rólge Vens te, Rýbıo da laıyq. Venske degen iltıpaty túsinikti. Dál osy senim ony vıse-prezıdenttikke alyp keldi.
Sonymen qatar Tramp sońǵy kezderi Rýbıony da jıi maqtaı bastady. Memlekettik hatshy ári ulttyq qaýipsizdik jónindegi keńesshi retindegi salmaǵy artyp, halyqaralyq saıasatta kózge túse bastaǵany prezıdent nazarynan tys qalǵan joq. Alaıda Axios sóılesken derekkózder muny Tramptyń Vensten teris aınalýy dep qabyldamaý kerektigin aıtady.
Qazaqstanda vıse-prezıdentti kim taǵaıyndaıdy?
Prezıdenttiń keńesshisi: «Vens pen Rýbıo – Tramp oıyndaǵy eń úılesimdi jup. Árıne, kósh basynda Vens tur», deıdi. Degenmen, onyń aıtýynsha, «Rýbıo – Vens» nusqasy da prezıdentke jat emes.
Venstiń artyqshylyǵy – daıyn komandasy. Eger ol kútkendeı prezıdenttikke tússe, naýqandy júrgizetin saıası tiregi bar. Al Rýbıo mundaı qurylym jasamaǵan ári Venstiń alǵa shyǵýyna qarsy emes. Ol muny buryn da ashyq aıtqan. Byltyr Vanity Fair jýrnalyna bergen suhbatynda Rýbıo:
«Eger Djeı Dı Vens saılaýǵa tússe, ol bizdiń úmitkerimiz bolady. Men ony alǵashqylardyń biri bolyp qoldaımyn», degen. Bul ustanym qazir de ózgermegen, Rýbıo ony Venske jeke de jetkizgen.
Eki saıasatkerdiń arasy jaqyn. Ekeýi Senatta birge qyzmet etti, apparat basshylary da ózara syılas. Tramptyń ózi byltyr Vensti «eń yqtımal murager» dep ataǵan. «Ádilin aıtqanda, ol – vıse-prezıdent», degen edi sol kezde. Biraq sonymen qatar Rýbıonyń da Venspen bir tizimde bolǵanyn qup kóretinin jasyrmaǵan.
Keńesshilerdiń aıtýynsha, Tramp muragerin erte ataýdan ádeıi boıyn aýlaq salady.
Bul tusta Rýbıonyń aqparat keńistigindegi belsendiligi de áser etpeı qoımaıdy. Memlekettik hatshy retinde ol álemdik saıasattyń aldyńǵy shebinde júr, ulttyq qaýipsizdik jónindegi keńesshi retinde Aq úıdiń ishki sheshimderine tikeleı qatysady. Al vıse-prezıdenttiń naqty jaýapkershilik aıasy aıqyn emes. Jańalyqty qalt jibermeıtin Tramp úshin Rýbıonyń jıi kózge túsýi zańdy.
Muny prezıdenttiń ózi de jaqsy túsinedi. Keı keńesshilerdiń paıymynsha, Tramptyń Rýbıony jıi kótermeleýi ony Venspen birge saılaýǵa túsýge yntalandyrýdyń bir amaly.
Alǵashqy saýalnamalar da Venstiń basymdyǵyn ańǵartady. Nıý-Gempshır ýnıversıtetiniń deregine súıensek, 2028 jylǵy respýblıkalyq praımerızde Vensti qoldaıtyndar 53 paıyzǵa jetse, Rýbıo nebári 7 paıyz jınaǵan. Ulttyq deńgeıdegi ózge saýalnamalarda da kórinis osyǵan uqsas.
Aldaǵy kezeńde Vens jurt aldyna jıi shyǵýy múmkin. Ol Respýblıkalyq ulttyq komıtettiń qarjy máselesine jaýap beredi ári qarashadaǵy saılaý qarsańynda eldi aralap, partııanyń О́kilder palatasyndaǵy ornyn saqtaýǵa kúsh salmaq.
Taraptardyń ózderi arasynda alaýyzdyq bar degen pikirdi joqqa shyǵarady. Vens Fox News arnasyna bergen suhbatynda:
«Marko – ákimshiliktegi eń jaqyn dostarymnyń biri. Jýrnalıster qoldan janjal jasaıdy, biraq bizde ondaı qaıshylyq joq», dedi.
