Foto: REUTERS
Abý-Dabıde Borouge kásipornynda órt áýe shabýylyna qarsy qorǵanys júıeleri atyp túsirgen nysandardyń synyqtary qulaǵannan keıin bastalǵany aıtyldy. Zaýyttyń jumysy ýaqytsha toqtatyldy, zardap shekkender týraly aqparat joq.
Buǵan deıin BAÁ bıligi áýe qorǵanys kúshteri Irannyń birneshe zymyrandary men drondaryn joıǵanyn málimdegen. Turǵyndarǵa qaýipsizdik sharalaryn saqtaý eskertilip, eldegi qatty dybystar áýe shabýylyna qarsy júıelerdiń jumysymen túsindirildi.
Bahreınde shabýyldan keıin Bapco Energies nysanyndaǵy rezervýar órtengen. Sonymen qatar Gulf Petrochemical Industries kásipornynda da órt bolǵany habarlandy. Eki órt te sóndirilgen, qaza tapqandar týraly málimet joq.
Soqqylar týraly aqparat Kýveıtten de túsken. Reuters jáne ózge de BAQ málimetinshe, buǵan deıingi ırandyq shabýyldar bul eldegi nysandarda órtke sebep bolǵan, al qazirgi jaǵdaı qaqtyǵystyń óńirdegi mańyzdy ınfraqurylymǵa áseri kúsheıip jatqanyn kórsetedi.
Aıta keteıik, buǵan deıin Izraıl qorǵanys áskeri Iran qalasyndaǵy munaı-hımııa keshenine soqqy jasady. Energetıkalyq nysanda órt shyqqan, qazirgi ýaqytta órt sóndirildi. Shabýyl saldarynan bes adam qaza taýyp, taǵy 170 adam jaraqat alǵan.
