Foto: Densaýlyq saqtaý mınıstrligi
Qazaqstanǵa týrıst retinde kelgen Italııa azamaty Almaty qalalyq Ortalyq klınıkalyq aýrýhanasynyń dárigerlerine shynaıy alǵysyn bildirdi. Dárigerler oǵan shuǵyl ári kúrdeli ota jasap, ómirin saqtap qaldy.
Pasıenttiń aıtýynsha, ol Qazaqstanǵa kelip, eldiń mádenıetimen, halqymen tanysýdy kópten armandaǵan. Alaıda Almatyǵa kelgennen keıin úsh kún ótken soń onyń jaǵdaıy kúrt nasharlap, ishi qatty aýyryp, jedel túrde aýrýhanaǵa jetkizilgen.
Densaýlyq saqtaý mınıstrliginiń baspasóz qyzmetiniń málimetinshe, tekserý barysynda dárigerler kontrastpen kompıýterlik tomografııa jasap, asa qaýipti dıagnoz − qolqanyń ınfrarenaldyq bóligindegi anevrızmanyń jarylýyn anyqtady. Mundaı patologııa shuǵyl hırýrgııalyq kómeksiz adam ómirine tikeleı qaýip tóndiredi. Sebebi ol ishki qan ketýmen qatar júredi.
Pasıentti professor Serik Tursynbaev pen hırýrgııa bólimshesiniń meńgerýshisi Rahman Saparbaev qarap shyqty. Dárigerler shuǵyl ota jasaý týraly sheshim qabyldady.
Dárigerlerdi daıarlaýdyń jańa modeli: Oqý merzimi men talaptar qalaı ózgeredi?
Ota shamamen tórt saǵatqa sozyldy. Ota barysynda dárigerler anevrızmanyń jarylǵanyn rastady jáne pasıentke jasandy qantamyrlyq protez ornatty. Mundaı otalar tamyr hırýrgııasyndaǵy eń kúrdeli otalardyń biri bolyp sanalady jáne joǵary dáldikti, jedel sheshim qabyldaýdy ári medısınalyq komandanyń úılesimdi jumysyn talap etedi.
«Men ómirimdi saqtap qalǵan dárigerlerge, sondaı-aq Qazaqstan boıynsha kún saıyn adam ómirin arashalap júrgen barlyq medısına qyzmetkerlerine zor alǵysymdy bildiremin. Kásibılikterińiz, kómekterińiz ben adamgershilikterińiz úshin raqmet», dedi týrıst.
Qazirgi ýaqytta naýqastyń jaǵdaıy turaqty dep baǵalanyp otyr. Ol ári qaraı ambýlatorııalyq em qabyldaıdy.
