Búgin Astanadaǵy «Ǵashyqtar saıabaǵynda» Olımpıada jáne Paralımpıada oıyndarynyń chempıondary men júldegerleri aǵash otyrǵyzdy.
«Ǵashyqtar saıabaǵyna" barlyǵy 19 túp Tıan-Shan shyrshasy otyrǵyzyldy. Bul Rıo-de-Janeıro Olımpıadasynda el qorjynyna túsken medal sanyn bildiredi.
QR Ulttyq Olımpıada komıteti men Astana ákimdigi birlesip uıymdastyrǵan sharaǵa Olımpıada chempıondary Jaqsylyq Úshkempirov, Serik Sápıev, Danııar Eleýsinov, júldegerler Ádilbek Nııazymbetov, Vasılıı Levıt, Gıýzel Manıýrova, Ekaterına Larıonova, Darıǵa Shákimova, Karına Gorıcheva, Farhad Harkı bar. Sondaı-aq, Paralımpıada oıyndarynda «altyn» enshilegen Qazaqstannyń tuńǵysh chempıony Zýlfııa Gabıdýllına men kúmis júldeger Raýshan Qoıshybaevalar qatysty.
«Men mundaı sharaǵa buryn da qatysqanmyn. «Atadan mal qalǵansha, tal qalsyn» degen ósıet bar. Sondyqtan súıikti qalamyzdyń kórikti de ásem bolýy úshin mundaı saýapty sharalarǵa qatysýǵa árdaıym daıynbyz. Bul saıabaqta otbasymyzben jıi qydyramyz. Endi ózim otyrǵyzǵan shyrshany otbasymmen kútip otyratyn bolamyn. Bolashaq urpaqqa Olımpıada oıyndarynan qalǵan taǵy bir umytylmas estelik bolady degen oıdamyn», – deıdi Olımpıada chempıony Danııar Eleýsinov.
