«Kóshpeliler oıyndarynyń bolashaǵy zor»

Qyrǵyzstannyń Sholpan-Ata qalasynda II Dúnıejúzilik kóshpeliler oıyndarynyń ótkenine bir aıdan astam ýaqyt boldy. Endi onyń qorytyndysyn oı eleginen qaıta ótkizip alatyn kez keldi. Osyǵan oraı, biz Mádenıet jáne sport mınıstrligi sport jáne deneshynyqtyrý isteri komıteti ulttyq sport túrleri men sporttaǵy múmkindigi shekteýli adamdarmen jumys basqarmasynyń basshysy Maqsat Qoıshybaevpen pikir almasqan edik. – Dúnıejúzilik kóshpeliler oıyndaryn jaqsy ótti degen pikir aıtylyp jatyr. О́zińizge jarys­ty uıymdastyrý nesimen unady? – Uıymdastyrý jaǵy jaqsy boldy. Qyrǵyzstanda jarysqa arnaıy atshabar men deneshynyqtyrý kesheni salynypty. Joldary da biraz jaqsarypty. Bizdiń delegasııa Ystyqkóldegi pansıonatta ornalas­ty. Sol jerden jarystarǵa baryp turdyq. – Qazaqstan quramasynyń daıyn­dyǵy qandaı boldy? – Jarysqa bizden 95 sportshy qatysty. Onda sportshylarymyz 39 medal aldy. Bulardyń arasynda 13 altyn, 13 kúmis jáne 13 qola júlde bar. Al jarysqa 63 memleketten ókilder kelgenin eskersek, elimizdiń komandalyq esepte úshinshi oryn alýy jaman nátıje emes dep oılaımyn. Kóshpeliler oıyndarynda eki balýanymyz qazaq kúresinen, erler jáne áıelder quramasy toǵyzqumalaqtan chempıon atandy. Sonymen birge, eki otandasymyz aýdaryspaq pen alyshtan, alaman báıge, sháıgi shabys pen toǵyzqumalaqtan bas júldeni jeńip aldy. Odan basqa, bes balýanymyz qazaq kúresinen, úsheýi qyrǵyz kúresinen birinshi oryndy ıelendi. Alyshtan da balýandarymyz jaqsy kúresti. Bul synda úsh kúmis júlde aldy. Bizdiń erler jáne áıelder quramasy mangala oıynyn jaqsy meńgerip alypty. Olar zııatkerlik oıynnyń bul túrinen ekinshi orynǵa ıe boldy. Sol sııaqty aýdaryspaq, mas-restılıng, gıýlesh jáne alaman báıgede bir-bir medaldan aldyq.  Sportshylarymyz qola júldelerdi de n­egizinen osy sport túrlerinen ıelendi. – Kelesi Dúnıejúzilik kóshpe­liler oıyndary 2018 jyly ótedi eken. Oǵan qatysatyn otandastarymyz kóbeıetin shyǵar? – Bul jarys – úlken joba. Ony «Kóshpelilerdiń Olım­pıadasy» deý­ge de bolady. Ázirge kelesi Oıyn­dar­dyń qaı jerde ótetini belgisiz. Jarysty Qazaqstan, Túrkııa, Ázerbaıjan jáne Qyrǵyzstan el­deriniń bireýi ótkizýi múmkin. О́ıt­keni, osy elderdiń basshylary me­morandýmǵa qol qoıǵan bolatyn. Al kelesi jyly Reseıdiń Ýlıanov oblysynda TMD memleketteriniń ulttyq sport túrleriniń festıvali ótedi. Oǵan bizdiń el de qatysady. Áńgimelesken Dastan KENJALIN, «Egemen Qazaqstan» ASTANA