Taǵzym kitaby tanystyryldy

Soǵys qasireti eshqashan umytylmaıdy. Sondyqtan da «Bozdaqtar» atty kitapty shyǵarýshylar bul maqsattaryn 1941-1945 jyldary maıdan dalasynan oralmaǵan jáne elge aman-esen oralǵan soǵys ardagerleri aldyndaǵy paryz dep sanaıdy. Taǵzym etedi. Bireý atasyn, bireý ákesin, aǵasyn, inisin, baýyrlaryn izdegender qarasy az emes. Kitap betterinen izdeý salǵan týysqandary jaıly jazylǵan derekterdi oqyp, sýretterin kórip, attary joǵalmaǵanyna urpaqtary qýanýda. Kópshilik tilegine saı, oblystyq mádenıet, muraǵattar jáne qujattama basqarmasynyń memlekettik muraǵaty «Bozdaqtardyń» 5-shi sońǵy shyǵarylymynyń nusqasymen de tanystyrdy. Alǵashqy jınaq úsh tom bolyp 1994-1997 jyldar aralyǵynda ja­ryq kórgen-di. Al 2014 jyly 4-tomy  basylyp shyqty. Bul kitapta da maıdangerler jaıly barlyq málimetter jazylyp, taǵzym joly ary qaraı  jalǵasatyny aıtylǵan. Endi sońǵy 5-shi tomda aldyńǵy kitaptarda eskerilmegen keıbir jaılar qaıta tolyq­tyryldy. Jalpy, bul kitap­tardy qurastyrýǵa Reseıdiń de izdestirý otrıadtary úlken úles qosypty. Muraǵat basshysy Halel Ákimhanovtyń aıtýynsha, «Boz­daqtar» kitabynyń sońǵy tomyn jazýda ólketanýshylar, tarıhshylar, izdeýshiler bolyp, barlyǵy eki jyl eńbektengen kórinedi. – Árıne, «Bozdaqtar» kitabyna máli­met jınaý, izdeý ońaı bolǵan joq. Mysaly, kezinde maıdanda qaza tapqan, habarsyz ketken, tutqynǵa túsken 1384 adamnyń qazir esimi belgili boldy. Jáne de aldyńǵy tomdarda jaryq kórgen 800-ge jýyq maıdangerler týraly qaıtadan qosymsha aqparat berildi. Bul kitaptyń mańyzdylyǵyn birden ańǵarýǵa bolady. О́ıtkeni, bul bárimizge ortaq taǵdyr. Batyr jaýyngerler rýhy aldyndaǵy borysh-mindetimiz,-deıdi H. Ákimhanov. Muraǵat qyzmetkerleri Reseı Qorǵanys mınıstrliginiń Orta­lyq muraǵatynan, Belarýs, Fınlıandııa arhıvterinen pav­lodarlyq jaýyngerler týraly málimetter tapty. Qujat­tardy, sondaı-aq, Harkov qoǵamdyq birlestigi, Shyǵys Prýs­sııada mert bolǵan keńes sarbazdary eskert­kish qory­nyń «Pamıat» – «Eskertkish» kom­mersııalyq emes uıymy, «Sakson memorıal­dary» (Germanııa) bir­les­tigi, re­seılik jáne bizdiń oblystyń izdestirý jasaqtary usynypty. Konslagerlerde tut­qynda bol­ǵan, partızan ja­saǵy jáne polshalyq áskerı quramalar qura­mynda soǵysqan pavlodarlyq jaýyngerler týraly buryn qupııa bolyp kelgen derekter tabylyp, bul málimetter kitaptarda jarııalandy. Sonymen qatar, jaýdyń lagerlerinde tutqynda bolǵan, Qıyr Shyǵysta Kvantýn áskerlerin talqandaýǵa qatysqan partızan otrıadtary men polıak áskerı quramalarynyń sapynda soǵysqan 5 myńnan astam pavlodarlyq jaýynger týraly anyqtalǵan derekter, sondaı-aq, buryn habarsyz ketkender qatarynda bolǵan jáne izdestirý jumystary nátı­jesinde aıqyndalǵan jaýynger týraly málimetter de qosyldy. – «Bozdaqtar» estelik kitaby – surapyl soǵystyń qaldyrǵan óshpes izin oısha saralaýǵa, jer­lesterimizdiń jaýyngerlik erligine qurmetpen bas ııýge múmkindik beredi. Ony soǵys jyldary qaza tapqan jaýyngerlerge arnalǵan máńgilik eskertkish deýge bolady, – deıdi H.Ákimhanov. Farıda BYQAI, «Egemen Qazaqstan» Pavlodar oblysy