«Altyn júrek» syılyǵy tabys etildi

Almaty qalasyndaǵy Abaı atyndaǵy Memlekettik opera jáne balet teatrynda «Altyn júrek» syılyǵynyń 10-shy mereıtoıly saltanatty marapattaý rásimi ótti. 2007 jyldan beri Qazaqstandaǵy eń qaıyrymdy jandardy marapattaıtyn «Altyn júrek» syı­lyǵy bıyl onynshy ret ótip otyr. «Baýyrjan» qaıyrymdylyq qory­nyń uıymdastyrýymen qolǵa alynǵan bul joba elimizdiń barlyq aımaqtaryn qamtıdy. «Meıirimdilik jan jylýy bar jerde mekendeıdi. Sondyqtan men úshin halyqtyń bul syılyq jaıly jyly lebizderin estip, qaıyrymdylyq jolynda júrgen adamdardyń jyl sanap artyp keletini qýantady. Bıylǵy 10 jyl­dyq mereıtoıly syılyq óziniń shynaıy altyn júrek ıe­gerlerin tapty dep oılaımyn», dep atap ótti «Altyn júrek» syı­lyǵynyń bas úılestirýshisi Gúlzat Sahova. Saltanatty rásimniń «Jetim balalarǵa kórsetken kómegi úshin» atty alǵashqy atalymnyń ıegeri Rada Haırýsheva boldy. Qaıyrym­dylyq ispen 2012 jyldan beri aınalysyp júrgen Rada Haı­rýshevanyń perzenthanadaǵy jaǵ­daıy joq analarǵa túrli sharalar uıymdastyryp, kıim-keshekter jınap beretin bastamasyna ýaqyt óte kele erikti qala turǵyndary da at salysyp, «Qol ushy» atty meıirban jandardan quralǵan top qurǵan eken. Sol ýaqyttan beri 250-ge tarta ár túrli jetim bala­ǵa kómekke baǵyttalǵan sharalar ótkizilgen. «Múgedek jandarǵa kórsetken qamqorlyǵy úshin» atty ekinshi atalym boıynsha «Úmit-Nadej­da» qoǵamdyq uıymynyń basshysy, I toptaǵy múgedek Dúısen­ǵalı Ospanov marapattaldy. О́zdi­ginen júrip-turý múmkin­digi­nen aıyrylǵan múgedek jan­darǵa qoldaý kórsetý úshin 120 múm­kindigi shekteýli adamǵa arnap uıym qurǵan Dúısenǵalı Ospanov «Polıgrafııalyq dızaın», «Tigin sheberligi», «Aǵylshyn tili» syndy tegin bilim kýrstaryn uıym­dastyrǵan. «Men ózge múmkindigi shekteýli jandardyń jaǵdaıyn ózim osy jaǵdaıǵa túskennen soń túsindim. Sondyqtan, qaıyrym­dylyqpen aınalysyp, osy jarym-jan adamdardyń ómirge degen qulshynystaryn arttyrý jolynda eńbek etýdi maqsat tuttym», dep qýanyshymen bólisti Dúısenǵalı Ospanov. Qaraǵandy oblysy, Ulytaý aýdanynda 35 jyldan astam ýaqyt boıy medısına salasynda qyzmet etip júrgen Ulmeken Qojasova «Densaýlyq saqtaý salasyna qos­qan úlesi úshin» atalymymen marapattaldy. Ol medısınanyń bar­lyq túri boıynsha tegin qyzmet kórsetip, talaı adamdy ajal aýzynan arashalap qalǵan jan. Al «Ardagerlerge kórsetken kómegi úshin» atalymy Almaty qalasynyń turǵyny, 1991 jyldan beri ardagerler uıymynda erikti bolyp júrgen, 2010 jyly «Mırıne» atty uıym ashqan, Uly Otan soǵysynyń ardagerlerine medı­­sınalyq, áleýmettik jár­dem kór­setip turatyn Kúlásh Sarsem­baevaǵa buıyrdy. Qazaq kúresiniń maıtalmany Jaqsylyq Úshkempirov «Sport salasynyń damýyna úles qosqany úshin» atalymy boıynsha laýreat atandy. Jaqsylyq Úshkempirov Almaty oblysyndaǵy «Myńbaev» eldi mekeninde balabaqsha men kishigirim jataqhana ǵıma­ratynyń boı kóterýine sebepshi bolǵan. Sonymen qatar, kásipker aýyl bala­laryna sport mektebin salyp, búginde 300-deı jas jet­kinshektiń sambo, dzıýdo, boks sııaq­ty sport túrlerimen aınalysýyna múmkindik berip otyr. Olımpıada chempıony sahna tórin­de taǵy bir márttik tanytyp, ar­baǵa tańylǵan eki bıshige bir-bir tul­par atady. Al óz qarajatyna Shý qalasyn­da zamanaýı eki balabaqsha salǵan kásipker Nıkon Kım «Bilim salasyna qosqan úlesi úshin» júldesine laıyq dep tanyldy. Júldeler qataryna keıingi jyldary ǵana qosylǵan «Qazaq­stannyń órkendeýine qosqan úlesi úshin» atalymy boıynsha Irlandııada qaıyrymdylyq qory­nyń negizin salýshy Fıona Korkoran marapattaldy. Ol Qazaqstanǵa arnaıy kelip Semeı qalasynda 30 adamǵa arnalǵan hos­pıs qurylysynyń júzege asyrylýyna sebepshi bolǵan. Fıona Korkoran búginde qazaqstandyq hospıs turǵyndaryna turaqty túr­de materıaldyq kómek qolyn sozyp turady. Úlken iske – úlken marapat demekshi, «Meıirbandar klýby» arqyly tanymal bolǵan Gúl­mıra Ábdirasheva «Jyldyń qaıy­rymdy adamy» ataǵyn ıelendi. Gúlmıra Ábdirasheva qur­ǵan klýb Qazaqstannyń 7 iri qala­synda 130 myń eriktiniń basyn biriktirip, jalǵyzbasty qart jan­darǵa, tur­mysy tómen otba­sylar­­ǵa, kóp­balaly otbasylarǵa, úı-kúısiz qalǵan janýarlarǵa qamqorlyq kórsetip, túrli aýqym­dy sharalar ótkizip júr. Bıylǵy jyldyń qaıyrym­dylyq jolyndaǵy eń aıtýly sharaǵa jınalǵan qaýym elimizge belgili ónerpazdardyń án-shashýyn tamashalady. Al ánshi Roza Rym­baeva Shymkent qalasynan arnaıy shaqyrtý alǵan, kóz janarynan aıyrylǵan kishkentaı qyzben birge án salyp, búldirshinniń armanyn oryndady. Mıra BAIBEK, «Egemen Qazaqstan» ALMATY