Birlesip atqarǵan sharýa berekeli bolady

nemese memleket-jekemenshik seriktestiginiń paıdasy nede? Ortalyq kommýnıkasııalar qyzmetinde «Qazaqstannyń memleket-jekemenshik seriktestigi ortalyǵy» AQ basqarma tóraǵasynyń orynbasary Sholpan Saparǵalı men vıse-prezıdenti Aıdos Kóbetov baspasóz máslıhatyn ótkizdi. «Qazaqstandaǵy memlekettik-jekemenshik seriktestigin damy­týdyń alǵashqy nátıjeleri» taqyrybynda uıymdastyrylǵan basqosýda aldymen tóraǵa orynbasary sóz sóıledi. Jumystarynyń barysyn egjeı-tegjeıli baıandaǵan Sh.Sapar­ǵalı yntalylyqpen jáne yn­ty­maq­tastyqpen atqarylǵan ister­diń bastapqy nátıjeleri kóńil kón­shitetinin aıtty. «Bir qýantarlyǵy, memleket-jekemenshik seriktestigi mehanızmine sońǵy kezderi qyzyǵýshylyq arta túsýde. Sózimiz dáleldi bolý úshin salystyrmaly derekterdi usynsaq, aǵymdaǵy jyldyń aqpan aıynda ártúrli daıyndyqtaǵy 102 joba usynylsa, qazan aıynda quny 1,1 trıllıon teńge bolatyn 274 joba daıyndaldy. Bulardyń 253-i aımaqtyq, 21-i respýblıkalyq dárejedegi joba. Birqataryn áli de ázirleý ústindemiz. Atalǵan jobalar negizinen mektepke deıingi mekeme, emhana, dárigerlik ambýlatorııa, sport jáne mádenıet ortalyqtary sekildi elimizdiń áleýmettik-ekonomıkalyq damýyna sep bolatyn nysandardy qamtıdy», dedi basqarma tóraǵasynyń orynbasary Sholpan Saparǵalı. Ol memleket-jekemenshik áriptestigi aıasynda qyrkúıek aıynda Aqtóbe oblysynda úsh, Soltústik Qazaqstan oblysynda bir joba boıynsha kelisim jasalǵany týraly da málimdedi. Munyń bári memleket pen jeke bıznes arasyndaǵy túsinistiktiń, iskerlik baılanystyń nátıjesi. Jıynda «Qazaqstannyń mem­leket-jekemenshik áriptestigi or­ta­lyǵy» AQ vıse-prezıdenti Aı­dos Oralhanuly qos taraptyń árip­testigi aıasynda jyl basynan beri jalpy somasy 11 mıllıard teńgeni quraıtyn 15 kelisimshartqa qol qoıylǵanyn jetkizdi. «Bul – óte jaq­sy kórsetkish. Aıta keterligi, mem­leket pen jekemenshik árip­tes­tigi áli de aýqymyn keńeıte alady. Buǵan  jergilikti ákimdik­terde jeke jobalardy jospar­laý, shaǵyn jobalardyń paıda bolýy, olardy iske asyrý múmkindikteriniń berilýi, kelisim jasaý kezinde qoıylatyn talaptyń jeńildetilýi, ýaqyttyń qysqarýy, kelisim ja­saýdyń jańa júıesi, nysanǵa ke­tetin shyǵynnan bólek, qyzmet shyǵyny da óteletindigi sebep bola ala­dy», dedi vıse-prezıdent. «Iаǵnı, jeke tarap óz qara­jaty esebinen kóshe shamdaryn ener­getıkalyq tıimdi, jaryq dıodty shamdarǵa aýystyryp, shyǵyn­daryn azaıtyp, qoldanylý merzimin uzartyp, operasııalyq shyǵyndardy 40-60 paıyzǵa deıin tómendetip, paıda kózderin tabady. Al memleket bastapqy úsh-tórt jyl boıy áýelgi qarajatty tó­leı tura, kelesi jeti-segiz jyl qata­rynan eki ese tómendetilgen baǵany taǵy beredi, tıisinshe qazyna qarjy­­syn únemdeýge qol jetkizedi. Kórip otyr­­ǵanymyzdaı, memleket-jeke­men­shik áriptestiginiń negizin­de eki tarapqa da paıdaly bolady. Jeke tarap uzaq merzimdi bıznes kó­­zine qol jetkizedi», dedi A.Oral­hanuly. Qazirgi tańda osyndaı árip­testik aıasynda 32 jobaǵa konkýrs jarııalandy. Onyń tórteýine qara­sha aıynyń sońyna deıin qol qoıylady dep kútýdemiz. Al mun­daı birige jumys isteýdi kez kelgen salada júzege asyrýǵa ábden bo­lady. Tipti, úı salý másele­sin de mem­leket-jekemenshik árip­tes­tigi ne­gizinde qolǵa alýdy qaras­­ty­­rý­damyz. Munda memleket óz tara­­pynan jer berip, elektr, sý je­lilerin tartyp beredi, al jeke tarap ol jerge úı turǵy­zyp, ese­sine daıyn páterler usyna­dy. Mem­leket ol baspanalardy jal­ǵa nemese turǵyn úı qory­nan páter alýǵa kezekke turǵan turǵyn­darǵa bólip beredi, dedi Aıdos Oralhanuly. Shara barysynda «Qazaq­stan­­nyń memleket-jekemenshik se­rik­testigi ortalyǵy» AQ ókilderi jýr­nalısterdiń saýaldaryna jan-jaqty jaýap berdi. Ashat RAIQUL, «Egemen Qazaqstan»