Qazaqstan Sırııaǵa gýmanıtarlyq júk jetkizdi

Sırııa Arab Respýblıkasynyń Tartýs portyna Qazaqstannan jóneltilgen gýmanıtarlyq júk jetkizildi. Sırııalyq bılikke júkti Qazaqstannyń Iordanııadaǵy Elshisi Azamat Berdibaı tapsyrdy. Keıbir arab aqparat kózderine qaraǵanda, Sırııadaǵy qantógis soǵys 400 myńnan astam beıbit turǵynnyń ómirin qıdy. Gýmanıtarlyq júkti jetkizýge RF Qorǵanys mınıstrligi kómektesken kórinedi. Tartýs portyna keshe jetken kemeden júkti túsirý jumystary búgin bastaldy. Qazaqstannan jetkizilgen konteınerlerde un, et ónimderi, makaron jáne basqa azyq-túlik taýarlary tıelgen. «Halyqaralyq qoǵamdastyq tarapynan jasalyp otyrǵan qoldaýǵa qaramastan, gýmanıtarlyq ahýal áli de túzelgen joq. Osyǵan baılanysty QR Prezıdenti N. Nazarbaev Sırııaǵa azyq-túlik týarlary túrinde gýmanıtarlyq kómekti jóneltý sheshimin qabyldady», - dedi Elshi A. Berdibaı sırııalyq delegasııamen kezdesý barysynda.   Esterińizge sala keteıik, 2012 jyly Qazaqstan Islam yntymaqtastyq uıymy arqyly Iordanııa men Lıvan úkimetine bosqyndaǵy Sırııa azamattaryna kómek retinde 400 myń AQSh dollaryn bólgen bolatyn. Sonymen qatar 2015 jyldyń qazanynda sırııalyq oppozısııa ókilderiniń kelissóziniń aıaqtalǵan kezinde Astanada sırııalyqtardyń dári-dármek pen azyq-túlik alýy úshin 300 myń eýro gýmanıtarlyq kómek kórsetý týraly Memorandýmǵa qol qoıylǵan edi.