Tulǵaǵa taǵzym

Kenshiler astanasynda Qaraǵandy oblysynyń qurylǵanyna 80 jyl tolýyna arnalyp ǵıbraty mol shara uıymdastyryldy. Bul kúni oblystyq tarıhı-ólketaný murajaıynda osydan jarty jyl buryn ómirden ótken óńirge belgili tulǵa, Qaraǵandy qalasynyń qurmetti azamaty Sultan Qaparuly Dosmaǵambetovtiń jeke kórmesi jurtshylyqqa esik ashty. Atalǵan kórmege oblys basshylyǵy, Sultan Qaparulymen birge qyzmettes bolǵan ardagerler, marqumnyń balalary qatysty. Shara barysynda qonaqtar S.Dosmaǵambetov týraly derekti fılmdi kórip, atpal azamattyń jeke muraǵattyq qorynan alynyp, kórmege qoıylǵan túrli qujattar men nagradalar jáne jeke qoldanysta bolǵan jádigerlermen tanysty. Sharaǵa qatysqan oblys ákimi Nurmuhambet Ábdibekov qoǵam qaıratkeri Sultan Dosmaǵambetov týraly ózekjardy lebizin jetkizdi. Sultan Dosmaǵambetovtiń 60 jylǵa jýyq ómiri Qaraǵandy oblysynyń tynys-tirshiligimen bite qaınasqan. Ol 1969 jyly Qaraǵandy oblystyq atqarý komıtetiniń tóraǵasy bolyp saılandy jáne osy qyzmetti 1982 jyldyń mamyr aıyna deıin atqardy. Sol jyldary Sultan Qaparuly bolashaq Elbasy Nursultan Ábishuly Nazarbaevpen ıyq tirese birge eńbek etip, oblystyń qaryshtap damýyna kúsh-jigerin aıamaı jumsady. Elimizdiń Tuńǵysh Prezıdenti N.Á.Nazar­baev «Stalnoı profıl Kazahstana» kita­bynda: «S.Q. Dosmaǵambetov oblystyq atqarý komıtetiniń tóraǵasy bolǵan jyldarda Metallýrgııalyq kombınat ujymynyń ju­mysyna barlyq qajetti jaǵdaıdy jasap otyrdy», dep jyly lebiz bildiredi. 1982 jyly S. Dos­­­ma­ǵambetov Qara­ǵandy pedagogıkalyq dene tárbıesi ıns­tı­­týtynyń rektory bolyp taǵa­ıyn­dalyp, uzaq jyldar jemisti qyzmet atqardy. Jezqazǵan jáne Qaraǵandy oblystary birikken kezde balama negizde Qaraǵandy oblystyq máslı­hatynyń hatshysy bolyp saılandy jáne osy laýazymda 1999 jyldyń aıaǵyna deıin jumys istedi. Sultan Qaparuly men zaıyby, bilikti zańger, ulaǵatty ustaz Roza Balbatyrqyzy ekeýi ónegeli urpaq tárbıelep ósirdi. Qyzdary Raýshan Sultanqyzy medısına ǵylym­darynyń doktory, professor, Qaraǵandy memlekettik medısınalyq ýnıversıtetiniń rektory, oblystyq máslıhattyń depýtaty bolsa, uldary Erlan Sultanuly ekonomıka ǵylymdarynyń kandıdaty, «EvrAzES iskerlik keńesi» qaýymdastyǵy ókildiginiń basshysy, Qaraǵandy qalasyndaǵy Ýkraınanyń Qurmetti konsýly bolyp qyzmet etedi. Tarıhı-ólketaný murajaıynyń dırektory Erjan Nurmaǵambetov kórmege qoıylǵan zattardyń barlyǵy da mýzeıdiń menshigine ótetinin aıtty. Sondaı-aq, ol jeke muraǵattyq materıaldardy jınastyrýda Sultekeń balalarynyń kóp kómek tıgizgenin rızashylyqpen atap ótti. Qaırat ÁBILDINOV, «Egemen Qazaqstan»