Almaty oblysy polısııa departamentiniń qyzmetkerleri IIM-niń esirtki qylmysyna qarsy is-qımyl komıtetiniń úılestirýimen, Qarasaı aýdandyq polısııa basqarmasy jáne prokýratýra organdarynyń qoldaýymen jedel-izdestirý is-sharalaryn júrgizdi. Nátıjesinde kózge túse bermeıtin saıajaı úıinde zańsyz jumys istegen sıntetıkalyq esirtki óndiretin zerthana anyqtalyp, tolyqtaı joıyldy.
«Tekserý barysynda eki kúdikti ustalyp, olardyń biri qamaýǵa alyndy. Tintý kezinde mefedron sıntetıkalyq esirtkisi, ony daıyndaýǵa arnalǵan arnaıy jabdyqtar, shyny ydystar, prekýrsorlar men ártúrli hımııalyq zattar tabylyp, tárkilendi. Zańsyz óndiris turǵyn úıdiń bir bólmesinde jasyryn túrde uıymdastyrylǵany belgili boldy», delingen Almaty PD habarlamasynda.
Quqyq qorǵaý organdarynyń ýaqtyly áreketiniń arqasynda qylmystyq qyzmet bastapqy kezeńinde toqtatylyp, iri kólemdegi esirtki partııasynyń zańsyz aınalymǵa túsýine jol berilmedi. Mamandardyń aıtýynsha, sıntetıkalyq esirtki daıyndaý kezinde qoldanylatyn hımııalyq komponentter adam ómiri men densaýlyǵyna asa qaýipti.
Atalǵan derek boıynsha sotqa deıingi tergep-tekserý júrgizilip jatyr. О́zge málimetter QR QPK-niń 201-babyna sáıkes jarııa etilmeıdi.
