Astanada tegin basketbol akademııasy ashyldy

Nazarbaev ýnıversıtetiniń sport ortalyǵy bazasynda balalarǵa arnalǵan tegin basketbol akademııasy ashyldy, dep habarlaıdy QazAqparat. Akademııa 8-14 jas aralyǵyndaǵy qyzdar men uldardy jattyqtyra alady. Bas jattyqtyrýshy - Deıan Parejanın, Serbııa azamaty. «Rasymen, akademııa ashyla qalǵan osy kezeńge biz Serbııadan maman shaqyrttyq. Bul kisi balalar basketbolyn ǵana emes, erler arasyndaǵy basketboldyń qyr-syryn jaqsy biletin adam. Úırensin dep ózimizdiń eki jattyqtyrýshyny qostyq. Jalpy, negizgi maqsatymyz - shetelden maman shaqyrý emes, basty maqsatymyz - balalar basketbolyn damytý», - deıdi Olımpıada chempıony, «Astana» basketbol klýbynyń bas dırektory Valerıı Tıhonenko. Onyń aıtýynsha, Astananyń aýa-raıy basketboldy damytý úshin múlde kedergi keltirmeıdi. Almatydaǵy basketboldyń damýy da aýa-raıyna emes, bul sportqa qanshalyqty kóńil bólinetinine baılanysty jáne basketbol tek Almatyda damysyn degen zań joq ekendigin aıtty V.Tıhonenko. Akademııaǵa qazirdiń ózinde 60 bala jazylǵan. Aqpan aıynan bastap «Astana» basketbol klýby qaladaǵy mektepterde sheberlik sabaqtaryn ótkizip, balalardy qyzyqtyra túspek.