Erlan Qarın Konstıtýsııanyń tek eń joǵary zań ǵana emes, sonymen birge ózindik qoǵamdyq kelisim ekenin atap ótti.
«Osy turǵydan alǵanda, menińshe, jańa Konstıtýsııa bizdiń bolmysymyzdy áldeqaıda aıqyn bildiredi jáne qoǵamda tabıǵı túrde qalyptasqan birqatar negizgi máseleler boıynsha kelisimdi naqtyraq aıqyndaıdy», dedi Memlekettik keńesshi.
Ol qoldanystaǵy Konstıtýsııanyń qabyldanǵanyna 30 jyl ótkenin eske salyp, búgingi kúni qoǵamnyń pikiri birqatar ózekti máselelerge qatysty ótkir bolatynyn jetkizdi. Máselen, jańa Konstıtýsııa jobasynda alǵash ret tabıǵatqa jáne ekologııaǵa uqypty qaraý týraly erejeler engizilip otyr. Bul taqyryptar 90-shy jyldary qoǵamdyq kún tártibinde is júzinde bolǵan joq.
Budan bólek, jańa Konstıtýsııada dástúrli qundylyqtardy qorǵaýdy kúsheıtý týraly norma qarastyrylǵan.
Sondaı-aq, Erlan Qarın sońǵy jyldary áıelderdiń quqyqtaryn saqtaý máselesine de qoǵamnyń nazary erekshe ekenin atap ótti. Onyń aıtýynsha, jańa Konstıtýsııada áıel quqyǵy nekedegi teń quqyqtylyq pen ózge de normalar arqyly qorǵalǵan.
Sonymen qatar, Erlan Qarın sońǵy birneshe jylda qoǵam tarapynan memlekettiń zaıyrly sıpatyn naqty ári aıqyn bekitýge degen suranysy týraly da pikir bildirdi.
«Bolashaqta da zaıyrly memleket qaǵıdatyna berik bolatynymyzdyń dálelin halyq estigisi keldi. Bul da jańa Konstıtýsııa jobasynda kórinis tapty. Sonymen birge jańa Konstıtýsııada ar-ojdan men dinı senim bostandyǵyna qatysty normalar saqtalady, keı tusta kúsheıtiledi, biraq memlekettiń zaıyrly sıpaty anaǵurlym aıqyn ári naqty túrde kórsetiledi. Iаǵnı múddelerdiń túsinikti ári aıqyn teńgerimi bekitiledi», dedi Memlekettik keńesshi.
Onyń aıtýynsha, jańa Konstıtýsııada jaı ǵana ıdeologııa emes, meta-ıdeologııa bekitiledi: ıaǵnı plıýralızm saqtalady, adamdar ártúrli kózqarasty ustanýy múmkin, biraq barlyǵy birtutas qoǵamdyq keńistikte ómir súredi.
«Parasatty tepe-teńdikti saqtaı otyryp, baıypty saıasat qısynyn rastaı kele, jańa Konstıtýsııa osy múddeler teńgerimin anaǵurlym aıqyn bekitýge, qoǵamdaǵy jańa suranys pen úmitti dálirek kórsetýge múmkindik beredi», dedi Erlan Qarın.
Ol jańa Konstıtýsııa qoǵamnyń jańa suranystary men úmitin kórsetetinin, demek, ózgeshe rıtorıka men jańa leksıkany talap etetinin atap ótti. Erlan Qarın qoldanystaǵy Konstıtýsııa eldiń aldyńǵy tarıhı kezeńnen endi shyǵyp jatqan kezde – 1995 jyly qabyldanǵanyn da eske saldy.
Sóz sońynda Memlekettik keńesshi jańa Konstıtýsııany ázirleý men ony qoǵammen birge talqylaý jańa tarıhı kezeńniń bastalýyn bildiretinin de jetkizdi. Onyń sózinshe, jańa Konstıtýsııanyń basty ereksheligi – qujat qoǵamda qalyptasqan tepe-teńdik pen kelisimdi ǵana bekitip qoımaı, eldiń qaı baǵytta damıtynyn jáne Qazaqstan bolashaqta qandaı memleket qurýdy kózdeıtinin aıqyndaıtyn basty suraqqa jaýap beredi.
Azamattardyń 78%-dan astamy jańa Konstıtýsııany qoldaıdy
«Jańa Konstıtýsııa jobasynda ǵylym men bilim qundylyqtary óziniń aıryqsha ornyn tapty. Alǵash ret ǵylym, bilim men ınnovasııalar memlekettiń damýynyń strategııalyq negizi retinde jeke bapta bekitildi. Munyń bári Qazaqstannyń adamı kapıtalǵa basymdyq beretin jáne tehnologııalyq turǵydan damyǵan el ekenin kórsetedi. Sondyqtan jańa Konstıtýsııa shartty túrde belgili bir damý kezeńin aıaqtap qana qoımaı, jańa kezeńdi ashady – memlekettiń damýynyń jańa basymdyqtaryn aıqyndaıdy», dep túıindedi Erlan Qarın.
