Saılaýshylar kótergen máseleler zańda kórinis tabady

Parlament Májilisiniń Tóraǵasy Nurlan Nyǵmatýlın  jumys saparymen Qostanaı oblysynda boldy. Ol aldymen  «AgromashHoldıng» jáne «SaryarqaAvtoProm» mashına jasaý zaýyttaryna baryp, olardyń ónimimen tanysty. Sodan keıin osyndaǵy eńbek ujymymen kezdesti. Májilis basshysy aldymen qostanaılyq mashına jasaýshylardy Qazaqstan Táýelsizdiginiń 25 jyldyǵymen  quttyqtap, osy ýaqyt ishinde elimiz qol jetkizgen tabystarǵa nazar aýdardy. – Elbasy Nursultan Nazar­baev­­tyń sarabdal saıa­saty­nyń arqasynda 25 jyl ishinde elimiz aldymen ótpeli ýaqyt­tyń barlyq qıyndyqtaryn jeńip, zor tabystarǵa jetti. Qazaqstandy jańa, yrǵaqty damý jolyna túsken elge aınal­dyrdy, – dedi Nurlan Zaırol­lauly. Májilis Tóraǵasy aldymen elimizdiń ekonomı­kalyq qaryshty damýy onyń áleýmettik ómiriniń kóterilgen­diginen kórinetinin tilge tıek etti. Ol mysaldarǵa súıene sóı­ledi. Elimizdegi áleýmettik salaǵa jumsalǵan shyǵyndar 25 jyl ishinde 26 mıllıon teń­geden 4,8 trıllıon teńgege deıin ósken, bul el bıýdjetiniń 46 paıyzyn quraıdy. Memlekettik ındýstrııalyq- ınnovasııalyq baǵ­dar­lama aıasynda elimizde júz­degen kásiporyn ashyldy, sonyń arqasynda jyl saıyn 270 myń jumys orny quryldy. Zeınetaqy men járdemaqy ósti. Aýyl sharýashylyǵyn damytýdyń baǵdarlamalary júzege asyp keledi, aýyldy kóterý qolǵa alyndy. Eldiń eksporttyq áleýeti ekonomıkalyq damýdyń kepili boldy, búgin 2500 túrli ónim 119 elge eksporttalady. Bıznesti menshik ıeleri men kásipkerler damytyp otyr. Spıker el ekonomıkasynda óńdeý ónerkásibiniń shıkizat sektorynyń aldyna shyqqanyn aıtty. Avtoónerkásip osyndaı ósýdiń aıǵaǵyna jáne ekonomıka lokomotıvine aınaldy. – О́ńirlerdiń ınvestısııa­lyq klımaty jaqsaryp ke­ledi. Mashına jasaý – sonyń jar­qyn mysaly. In­dýs­trııalyq aımaqtar quryldy, onda av­tobólshekter zaýyty sa­lynatyn bolady, – dedi N.Nyǵ­matýlın mashına jasaýshy­lar aldynda. Rasynda, Qos­tanaıdaǵy qos zaýyt tek óńirdiń ǵana emes, jalpy elimizdiń ekonomıkasyna qomaqty úles qosyp keledi. «SaryarqaAvtoProm» zaýyty byltyr 5 myń mashınany sapqa qoıdy. Májilis Tóraǵasy munan keıin depýtattardyń zań shy­ǵarý qyzmetine toqtaldy. Ol depýtattar kúzgi kanıkýldan bergi ýaqyttyń ishinde 9 zań qabyldaǵanyn, al Májilistiń jańa shaqyrylymy jumysyn bastaǵan ótken jyldyń naý­ryz aıynan búginge deıin 51 zań jobasyn qarap, onyń 40 shaqtysyna Prezıdent qo­ly qoıylǵanyn jetkizdi. Nur­lan Zaırollauly sonyń ishin­de áleýmettik ózekti másele­ler – min­detti áleýmettik medı­sı­na­lyq saqtandyrý týraly, jaıylym, respýblıkalyq bıýdjet, eks­tremızm men terrorızmge qar­sy kúres, volonterlyq qyz­met týraly zańdarǵa toqtalyp ótti. – Medısınalyq saqtandyrý jarnasynan azamattardyń 15 sanaty bosatylady, olardyń arasynda múgedekter, kóp balaly analar, balalar, zeınetkerler sekildi áleýmettik az qorǵalǵan jandar bar. Medı­sı­nalyq saqtandyrýdyń arqa­synda azamattar óziniń otbasy­lyq bıýdjetinen bir tıyn shy­ǵarmaı tekserilip, densaýly­ǵyn túzeıtin bolady, – dedi Májilis Tóraǵasy. Sonymen qa­tar, N.Nyǵmatýlın elimizdiń Par­lament depýtattary qabyldaǵan barlyq zań halyqtyń jaǵdaıyn jaqsarta túsý úshin áleýmettik reformalarǵa baǵyttalǵanyn aıtty. Mashına jasaýshylar ujy­myn­daǵy kezdesýde jumys­shylar Májilis Tóraǵasyna túrli suraqtar qoıdy. Sonyń ishin­de qostanaılyq mashına jasaýshylar shyǵarǵan kólikter sapasy týraly onyń pikirin bilgisi keldi. – Parlament garajyndaǵy kólikterdiń 90 paıyzy – qazaq­standyq ónim. Men qostanaılyq mashına jasaýshylar shyǵarǵan mashınalar sapasyn joǵary baǵalaımyn. Munda kólikter tereńdetile qurastyrylady, qazaq­standyq mazmundy ıgergen, – dedi Parlament Máji­lisiniń Tóraǵasy. Munan keıin N.Nyǵmatýlın Qostanaı un kombınatyna bas suǵyp, shyǵarǵan ónimmen tanys­ty. Eksportqa shyǵarylatyn unnyń tórtten biri Qostanaı kásiporyndarynda óńdeledi. Qostanaı un kombınaty sonyń biregeıi desek bolady. Onda táýligine 350 tonna un tar­tylyp, 90 tonna makaron buıymdary óndiriledi. Kásip­oryn ónimi otandyq naryq­ty toltyrýmen qatar, ony Aý­ǵanstan, Qyrǵyzstan, Túrik­men­stan jáne Grýzııa satyp alady. Májilis Tóraǵasy qan quıý ortalyǵynyń jumysymen tanysqan soń, saparyn qosta­naılyq medısına qyzmet­kerlerimen kezdesýmen aıaqtady. Onda Nurlan Zaırollauly Parlament Elbasy tapsyrmalaryn oryndaýǵa belsene qatysatynyn erekshe atap ótti. Mártebeli qonaq dárigerler aldynda halyqty áleýmettik qorǵaý máselelerine arnaıy toqtap, 2018 jyldyń basynan ómirge joldama alatyn zań­dardaǵy jańalyqtar týraly aıtyp berdi. Tóraǵanyń sózine qaraǵanda, ataýly áleýmettik kómekti kúnkóris qorjynynyń 40-50 paıyzy bolatyndaı etip taǵaıyndaý esebinen biryńǵaı áleýmettik ataýly kómekti tóleý jáne otbasynyń barlyq múshelerine járdemaqy taǵaıyndaý qaıta qaralady. Sonymen qatar, múgedekter men kóp balaly analarǵa arnaıy memlekettik járdemaqy taǵaıyndaý jeńildetiletin bolady. Zańdardaǵy basqa da jańalyqtar sóz boldy. Májilis Tóraǵasy Táýelsizdiktiń 25 jylynda Elbasynyń elimizdegi yrǵaqty damýdyń jáne beıbit, tatý-tátti ómirdiń kepili ekendigin aıtyp ótti. N.Nyǵ­matýlın medısına qyzmet­ker­lerin tolǵandyrǵan áleýmettik medı­sınalyq mindetti saqtan­dyrý, jas mamandardy daıyndaý, biliktilikterin arttyrý jáne aýyldaǵy aýyz sý týraly suraqtaryna jaýap berdi. Ol óziniń sapar mańy­zyna toqtala kele, saılaýshylar­men kezdesýler eldegi ekonomı­kalyq jáne áleýmettik másele­lerdi anyǵyraq bilýge yqpal etetindigin aıtty. Saılaý­shylar qoıǵan suraqtar, másele­lerdiń sheshimi depýtattar qabyl­daıtyn zańdardan kórinis tabatyn bolady. Sapar maqsaty da osy. Nurlan Nyǵmatýlınniń saparyna oraı, oblys ákimi Arhımed Muhambetov óńir jurtshylyǵynyń atynan rahmet aıtyp, zań shyǵarýshylyq qyzmette tabys tiledi. Názıra JÁRIMBETOVA, «Egemen Qazaqstan» QOSTANAI