Zeınetaqy jınaqtaryn merziminen buryn alǵa múmkindik týýy múmkin

Eger tıisti zańnamaǵa ózgerister engizilse, qazaqstandyqtar zeınetaqy jınaqtarynyń bir bóligin oqýǵa, emdelýge nemese ıpoteka alýǵa jumsaı alady, dep habarlaıdy QazAqparat. «Qazir bul másele (zeınetaqy jınaqtaryn merziminen buryn sheship alý - agenttik) talqylanyp jatyr. Ulttyq bank tóraǵasy da bul másele týraly aıtqan, ıaǵnı bul álemdik tájirıbe bolǵandyqtan, talqylap jatyrmyz. Eger bul zańmen bekitilse, zeınetaqy qorynyń bir bóligi eń kerekti dúnıelerge, emdelýge, bilim alýǵa nemese ıpoteka alýǵa beriledi. Qazirgi tańda azamattarǵa eń qajetti osy úsh baǵyt alynyp otyr», - dedi «BJZQ» AQ Basqarma tóraǵasy Nurbıbi Naýryzbaeva. Onyń aıtýynsha, bul bastamalardy júzege asyrý úshin zeınetaqymen qamtý týraly zańǵa ózgerister engizý kerek. Alaıda qazir bul másele tek talqylanyp jatyr. Sondaı-aq, N.Naýryzbaeva  BJZQ janynan qoǵamdyq keńes qurylatyndyǵyn aıtty. Ol keńeske jýrnalıster, sarapshylar, zeınetaqy salymyn salyp otyrǵan adamdar men zeınetkerler múshe bolady.