Mamın Eýrazııalyq ekonomıkalyq komıssııa Keńesiniń otyrysyna qatysty

Búgin Qazaqstan Respýblıkasy Premer-Mınıstriniń birinshi orynbasary Asqar Mamın vıdeokonferensııa rejıminde Eýrazııalyq ekonomıkalyq komıssııa Keńesiniń kezekti otyrysyna qatysty. Otyrystyń kún tártibinde 19 másele qarastyryldy, dep habarlaıdy primeminister.kz. Talqylaý qorytyndysy boıynsha qatysýshy elder Eýrazııalyq ekonomıkalyq odaqtaǵy (EAEO) kedendik-tarıftik retteý, ónerkásip jáne AО́K, energetıka, zııatkerlik menshik jáne aqparattandyrý salasyndaǵy birqatar mańyzdy sheshimder qabyldady. Komıssııa Keńesiniń otyrysy barysynda EýrazEQ-qa múshe memleketterdegi aýyl sharýashylyǵyna arnalǵan mashınalar men jabdyqtar óndirisin jáne eksportyn damytý máselelerine basa kóńil bólindi. Atalǵan máselelerdi Eýrazııalyq ekonomıkalyq odaqqa múshe memleketterdiń Úkimet basshylarynyń qaraýyna engizý josparlanǵan. Budan ózge, Eýrazııalyq damý bankiniń ıntegrasııalyq áleýetke ıe kooperasııalyq jobalardy damytýdy qarjylandyrýy máseleleri talqylandy. Keńes músheleri sáıkes kooperasııalyq jobalardy qaraý men irikteý úshin jumys tobyn qurý týraly ókim qabyldady. Atalǵan sheshimderdi iske asyrý EýrazEQ-qa múshe memleketterdiń barlyǵynyń jalpy ónerkásiptik damýyna septigin tıgizedi. Barlyq qarastyrylǵan máseleler boıynsha Eýrazııalyq ekonomıkalyq odaqtyń odan ári damýyna baǵyttalǵan ózara tıimdi sheshimderge qol jetkizildi.