BQO-da 9 myń adam nətıjeli jumyspen qamtylady

Elbasy tapsyrmasyna sáıkes qolǵa alynǵan «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna» sáıkes Qazaqstanda 106,5 myń (jylyna 21,3 myń) adam, Batys Qazaqstan oblysynda 4 myń (jyl saıyn 800) adam kásiptik daıarlyqpen qamtylmaq. Bul týraly Oralda ótkizilgen keńeste QR Bilim jáne ǵylym mınıstrligi Tehnıkalyq jáne kásiptik bilim departamentiniń bas sarapshysy Baqytjan Bıekova málim etti, dep habarlaıdy QazAqparat. Onyń aıtýynsha, soǵan qosa elimiz boıynsha 130 myń, BQO-da 5 myńdaı adam qysqa merzimdi kásiptik bilim alyp shyǵatyn bolady. Nátıjesinde respýblıka boıynsha 236,5 myń, BQO-da 9 myńnan astam adam baǵdarlamamen qamtylady Buryn «Jumyspen qamtýdyń jol kartasy - 2020» baǵdarlamasy aıasynda merzimdik jumys oryndaryn ashýǵa basymdyq berilgeni belgili. Endi bıyldan bastap oqytý arqyly turaqty jumys oryndaryn ashýǵa kúsh salynbaqshy. Sondaı-aq kirisi az turǵyndarǵa jeke isin ashý úshin de memleket tarapynan qoldaý jasalady. Jańa baǵdarlamanyń basty maqsaty - elimizde nátıjeli jumyspen qamtýǵa jaǵdaı jasaı otyryp, halyqqa tabys qoryn molaıtýǵa múmkindik berý. Atalǵan joba kirisi az aýyl halqynyń eleýli bóligine kásipkerlikte alǵashqy qadamdaryn jasaýǵa jáne ózderiniń bıznes-bastamalaryn júzege asyrýǵa múmkindik beredi.