Golovkın: Boksqa kelýime otbasym sebepker boldy

Qazaqstandyq Gennadıı Golovkın amerıkalyq Power radıostansııasynyń The Breakfast Club baǵdarlamasyna suhbat berdi, dep jazady vesti.kz. Suhbat barysynda boksshy óziniń boksqa qalaı kelgenin, kelesi jekpe-jektiń ne sebepti Nıý-Iorkte ótetinin aıtty. Denıel Djeıkobspen aldaǵy jekpe-jegi jaıly aıta kele, boksshy Nıý-Iorkti "boks Mekkesi" dep atady. "Barlyǵy Nıý-Iorkti qurmetteıdi. Bul Bokstyń Mekkesi. Bul kommersııalyq emes, tarıhı jekpe-jek bolady", - dedi Golovkın. "Josparym bar, jalǵyz emes. Djeıkobs qalaı judyryqtasý kerek ekenin biledi. Men árdaıym daıynmyn, biraq meniń naqty josparym joq", - dep málimdedi GGG. Golovkın boksqa qalaı kelgeni jaıly da aıtty. "Erterekte bolatyn. Buǵan otbasym sebep boldy dep oılaımyn. Maǵan sporttyń kez kelgen túri unaıdy: basketbol, beısbol. Aǵalarym boksqa barýym kerek ekenin, óz qabiletimdi tekserip kórýim kerek ekenin aıtty", - dedi boksshy. Osy kezde júrgizýshi "Úlkenderdiń "bar da, uryp tasta" dep aıtqanyn kóp estigenmin", - dedi. "Mende de sondaı jaǵdaı kóp bolǵan. Qazir bári de basqasha", - dep jaýap berdi Golovkın. Sondaı-aq qazaqstandyqqa jas kezinde qansha ret jeńilgeni jaıly suraq qoıyldy. "Kóp emes, tórt nemese bes ret, biraq kóshede eshqashan jeńilip kórmegenmin", - dep málimdedi ol. Baǵdarlama júrgizýshisi Golovkınniń 24 jekpe-jekti nokaýtpen aıaqtaǵanyn eske ala otyryp, sońǵy ret qashan jeńilgenin surady. О́ziniń bul suraqtyń jaýaby boksshynyń jasóspirim shaǵy bolar dep boljady. Biraq, Genadıı Golovkınniń aıtýynsha, ol sońǵy ret 2004 jylǵy Olımpıada fınalynda jeńilgenin aıtty. Al Roýzıdiń Amanda Nýnesten 48 sekýnd ishinde jeńilgeni jaıly pikir bildirgen ol bul oqıǵany essizdik dep atady. "Kórdim. Bul essizdik. Ol áli chempıondyq tıtýldarǵa daıyn emes dep aıtar edim. Oǵan ýaqyt kerek. UFC-ge Roýzı sııaqty adamnyń kerek ekenin 100 paıyz senimmen aıta alamyn. Men ony jaqsy bilemin, ol meniń dosym. Bul basqa sport túri, onda bári qyzyq. Boks - klassıka, al UFC - haı-tek ispettes. Essizdikter bolyp jatatyn shyǵar, biraq syrttan qaraǵanda keremet kórinedi", - dedi Golovkın. Suhbatynyń sońynda Golovkın AQSh-ta qalaı turyp jatqany jaıly baıandady. "Ýaqytym kóp emes. Los-Andjeleste otbasymmen birge turyp jatyrmyn. Áıelimmen komedııalyq shoýlar men fılmderdi kórgendi unatamyn. Men qarapaıym jigitpin. Jaǵalaýǵa barǵandy, balamdy mektepke aparǵandy unatamyn", - dedi ol. Suhbat barysynda onyń karerasyn qashan aıaqtaıtyny týraly da suraq boldy. Bul suraqqa boksshy "Jaqsy suraq. Qazir meniń ózimdi 25 jastaǵy adam sekildi sezinemin. Naqty eshteńe aıta almaımyn. Bul boks. Múmkin kelesi jekpe-jekten soń, múmkin erteń bolar. Kez kelgen sátte. Bul ómir ǵoı", dep jaýap berdi.