«Barys» óz aıdynynda Ýfanyń «Salavat Iýlaev» komandasyn jeńdi

Qurlyqtyq hokkeı lıgasynyń turaqty chempıonatynda Astananyń «Barysy» óz aıdynynda Ýfanyń «Salavat Iýlaev» komandasyn qabyldap, 4:3 esebimen jeńiske jetti. Kezdesýdiń alǵashqy kezeńinde komandalar bir-birine laıyqty qarsylyq kórsetti. Alaıda, qonaqtar adýyndy shabýyldap, 11-mınýtta Tomash Mertldiń kómegimen esep ashty. Ekinshi taım asa tartysqa toly órbidi. Alma kezek soǵylǵan shaıbalardan qaı ujymnyń jeńiske jetetinin aldyn ala boljap bilý múmkin emesteı boldy. 24-mınýtta Naıdjel Doýs mergendigimen tanylyp, tarazy basyn teńestirse, arada birer mınýt óter-ótpes Kırıll Panıýkov «Barysty» alǵa shyǵardy. Al  27-mınýtta Naıdjel Doýs dýbl ıesi atanyp, eseptegi basymdyqty arttyrdy. Mine, osydan keıin qonaqtar qaıratyna minip, qaýipti shabýyldaryn údetti. 35-mınýtta Maksım Maıorov urymtal tusty utymdy paıdalanyp, eseptegi aıyrmashylyqty qysqartsa, 36-mınýtta Aleksandr Nesterov tablodaǵy kórsetkishti 3:3-ke jetkizdi. Negizgi ýaqyttyń sońyna deıin osy esep ózgerissiz qalyp, jeńimpaz overtaım arqyly anyqtaldy. Bul synda Kevın Dallmen 65-mınýtta sheshýshi goldy soǵyp, óz komandasynyń kezekti jeńisine septigin tıgizdi. Taǵy bir aıta keterligi osy matchtan keıin Naıdjel Doýs QHL-de jalpy sany 300 upaı jınady. Astanalyqtar 50 oıynnan 73 upaı jınap, «Shyǵys» konferensııasynda ázirge 6-orynda keledi. Kelesi kezdesýin Novokýzneskiniń «Metallýrg» komandasymen ótkizedi.