«Barselonanyń» burynǵy jattyqtyrýshysy bapkerlik mansabyn aıaqtady

AZ, «Aıaks», «Barselona», «Bavarııa», «Manchester Iýnaıted» fýtbol komandalarynyń burynǵy jattyqtyrýshysy gollandııalyq Lýı Van Gal bapkerlik mansabyn aıaqtaıtynyn málimdedi. Bul týraly eurosport.ru habarlady. «О́tken jyly bapkerlik qyzmetten máńgige ketemin dep oılaǵanmyn, alaıda azdaǵan úzilis alýdy jón kórdim. Biraq endi burynǵy jumysyma qaıta kelmeıtin sııaqtymyn. Sońǵy kúnderi otbasymda biraz ózgerister boldy. Bul maǵan bir belgi bolyp tur», – dedi Van Gal. Ol sońǵy ret jattyqtyrǵan «Manchester Iýnaıted» klýbynan 2016 jyldyń mamyr aıynda ketken. Búginge deıin oǵan Qytaıdan jalaqysy 50 mıllıon eýro bolatyn usynys túsken. Bapkerlik mansabynda ol tórt ret Gollandııa chempıonatynda top jarsa («Aıaks», AZ), bir márte Gollandııa Kýbogynda jeńip alǵan. Ispanııa birinshiliginde eki dúrkin chempıon atanyp, bir márte Ispanııa Kýbogyn alǵan («Barselona»), sondaı-aq «Bavarııamen» bir retten Býndeslıgany jáne Germanııa Kýbogyn utyp aldy. Al sońǵy klýby «Manchester Iýnaıtedpen» Anglııa Kýbogynda jeńis tuǵyrynan kórindi. Halyqaralyq týrnırlerde de biraz jetistikterge jetken. «Aıakspen» Chempıondar lıgasyn, ÝEFA Kýbogyn, ÝEFA Sýperkýbogyn, Qurlyqaralyq Kýbokty jeńip aldy. Al «Barselonamen» ÝEFA Sýperkýbogyna qol jetkizdi.